Elimizdegi 10 aimaqta aýa sapasy nashar. Bul týraly Ekologiia, geologiia jáne tabiǵi resýrstar vitse-ministri Zúlfiia Súleimenova málim etti, dep habarlaidy QazAqparat.
«Qazaqstannyń 45 ónerkásiptik aimaǵyndaǵy aýanyń lastaný deńgeiine monitoring júrgizildi. Nátijesinde 10 aimaqta aýa sapasy nashar ekeni anyqtaldy.Nur-Sultan, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazǵan jáne Shymkent qalalarynda aýanyń lastaný deńgeii óte joǵary. Oǵan úsh negizgi faktor áser etedi. Máselen, Nur-Sultan men Almatyda jylytý elektrostantsiialary aýaǵa ziiandy qaldyqtardy kóp mólsherde bóledi. Temirtaý men Óskemende ekologiiaǵa iri kólemde ziian keltiretin – ol ónerkásip. Al batys óńirlerde eskirgen káriz júieleri aýany lastap otyr», – dedi vitse-ministr.
Zúlfiia Súleimenovanyń dereginshe, óńirlerdegi ekologiia ahýalyn jaqsatrý úshin 16 jol kartasy ázirlengen.
«Jol kartasyna sáikes, 485 is-shara uiymdastyrý josparlanǵan. 2020 jyldan 2022 jyldyń birinshi toqsanyna deiin belgilengen jumystar 50%-ǵa aiaqtaldy. Osy sharalardyń nátijesinde 2025 jylǵa qarai 10 aimaqtaǵy ekologiianyń lastaný deńgeii tómendeidi dep boljap otyrmyz», - dep atap ótti Zúlfiia Súleimenova.
Elimizde aýanyń lastanýyna sebepshi bolyp otyrǵan iri 16 kásiporyn bar. Vitse-ministrdiń aitýynsha, atalǵan kompaniialar óz qarajattary esebinen ziiandy qaldyqtar mólsherin 20-30%-ǵa deiin azaitýǵa mindetteldi.
