Búginnen bastap elimizde «Nazar aýdaryńyz - balalar!» is-sharasy bastaldy. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy "QazAqparat" HAA.
«Balalardyń joldaǵy qaýipsizdigi - mańyzdy jáne ózekti taqyryp. Ókinishke qarai, respýblikadaǵy árbir tórtinshi jol-kólik oqiǵasy kámeletke tolmaǵandardyń qatysýymen jasalady. Jyl basynan beri osyndai jol-kólik oqiǵalarynan 90 bala qaza taýyp, 1 860 bala jaraqat aldy. Pandemiia jáne halyqty áleýmettik oqshaýlaý kezeńinde, oqýshylardyń kópshiligi qashyqtan oqytý formatqa kóshirilgen kezde, jas urpaq arasynda bilim berý jáne quqyqtyq túsindirý jumysynyń kólemi de tómendedi. Osyǵan bailanysty 23 tamyzdan bastap oqý jylynyń bastalýy qarsańynda Ishki ister ministrligi «Nazar aýdaryńyz - balalar!» is-sharasyn uiymdastyrýda», - dedi Nurdildá Oraz.
Resmi ókildiń aitýynsha, atalǵan is-shara 2 kezeńnen, naqty aitqanda daiyndyq jáne negizgi kezeńnen turady.
«Daiyndyq kezeńi aiasynda: bilim berý mekemeleriniń aýmaǵyna irgeles jerlerde kóshe-jol jelisiniń jáne jol qozǵalysyn uiymdastyrýdyń tehnikalyq quraldarynyń jai-kúiin zertteý; ata-analarmen jáne muǵalimdermen jol qozǵalysy qaýipsizdigi taqyrybynda profilaktikalyq sabaq, dáris ótkizý josparlanǵan», - dedi ol.
Onyń atap ótýinshe, negizgi kezeń balalarmen tikelei júrgiziledi. Ol jol qozǵalysy qaýipsizdigin nasihattaýǵa jáne balalardyń jol-kólik jaraqattanýynyń aldyn alýǵa baǵyttalǵan is-sharalardy qamtidy.
«Budan basqa, osy jyldyń 1 qyrkúieginen bastap oqý oryndaryna irgeles jerlerde politsiia jasaǵy ulǵaitylady. Balalardyń joldardaǵy qaýipsizdigi kóp jaǵdaida ata-analarǵa bailanysty ekenin atap ótken jón. Jol erejesin saqtańyz jáne balalardy qorǵańyz!», - dedi Nurdildá Oraz.
