Koronavirýspen kúreske tsifrlyq tehnologiialar qarqyndy engiziledi. Bul týraly búgin Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy QazAqparat.
«Eldegi indetpen kúres jáne iskerlik belsendilikti saqtaý arasyndaǵy teńgerimdi saqtaý maqsatynda tsifrlyq tehnologiialar qarqyndy engiziledi. Vaktsina alǵan tulǵalarǵa monitoring júrgizý jáne olardy esepke alý úshin «Antikovidtik pasport» ázirlendi. «Ashyq» jobasyn mashtabtaý jáne qoldanystaǵy biznes sýbektileriniń jumysyn qamtamasyz etý ári qyzmettiń tyiym salynǵan túrlerin iske qosý úshin ony «Antikovidtik pasportpen» integratsiialaý júrgiziledi. Monitoring toptary jumysynyń tiimdiligin jáne ashyqtyǵyn arttyrý úshin uialy bailanys operatorlarynyń iesiz málimetteri negizinde «Jylylyq kartasy» engiziledi», - dedi ministr.
Sonymen qatar ol bos emes tósek-oryn qoryna basymdyq bere otyryp, eldegi epidemiologiialyq ahýaldy baǵalaý matritsasynyń qosymsha kriteriileri ázirlenip, vedomstvoaralyq komissiianyń bekitýine usynylatyndyǵyn aitty.
«Aldyńǵy qatarly halyqaralyq tájiribe negizinde ázirlengen atalǵan tehnologiialardy keshendi túrde qoldaný epidemiiaǵa qarsy is-sharalardyń tiimdiligin arttyrady», - dedi Aleksei Tsoi.
