QR IIM Kriminaldyq politsiia departamenti bastyǵynyń orynbasary Qanat Nurmaǵambetov elimizde urlanǵan kólikterdiń qalai satylatyndyǵyn túsindirdi, dep habarlaidy «QazAqparat» HAA.
«Búginde eń kóp taralǵan túri lizing, nesie jáne avtomobildi jalǵa alý bolyp otyr. Máselen, sońǵy ýaqytta Resei Federatsiiasymen ózara is-qimyl barysynda mundai jaǵdaiǵa tap bolatyndar kóbeiip tur. Reseide alaiaqtar kólikti lizingke satyp alady da, birinshi aiynda lizingti nemese nesieni tóleidi. Al odan keiin mashinany Qazaqstan aýmaǵyna aidap kelip, ony bizdiń aýmaqta satyp jiberedi ári bizdiń respýblikanyń atyna rásimdeidi», - dedi Qanat Nurmaǵambetov Ishki ister ministrligindegi brifing barysynda BAQ ókilderiniń saýalyna orai.
Al Reseide lizing kompaniiasy nesie tólenbei qalǵannan keiin kólikti izdep tappai qalady.
«Lizing tólemi toqtaǵannan keiin ǵana álgi kólikke izdeý jariialanady. Kólikti jalǵa alý kezinde de qylmyskerler dál osyndai áreketke baryp júrgeni belgili boldy», - dedi ol.
