Qazaqstanda 15 qyrkúiek kúni tumaýǵa qarsy vaktsinatsiia bastalady. Bul týraly QR Densaýlyq saqtaý birinshi vitse-ministri Marat Shoranov aitty, dep habarlaidy QazAqparat.
«Jaqyndap qalǵan JRVI, iaǵni tumaý maýsymyna airyqsha toqtalyp ótkim keledi. Biyl biýdjet qarajaty esebinen Reseide shyǵarylǵan «Grippol+» vaktsinasynyń 2,5 mln dozasy satyp alyndy. Vaktsina quramynda aldaǵy maýsymǵa qarsy shtamm bar. Bul respýblikanyń jalpy turǵyndarynyń 13 paiyzyn qamtýǵa múmkindik beredi. Dúniejúzilik densaýlyq saqtaý uiymynyń usynysy – 10 paiyz. JRVI men tumaýǵa qarsy vaktsinatsiia 15 qyrkúiekte bastalady», - dedi ol Ortalyq kommýnikatsiialar qyzmetindegi baspasóz máslihatynda.
Birinshi vitse-ministrdiń atap ótýinshe, osyǵan orai elimizdiń Bas memlekettik sanitar dárigeriniń qaýlysy qabyldanǵan.
«Memlekettik biýdjet qarajaty esebinen halyqtyń eń álsiz toby vaktsinatsiialanatyndyǵyn atap ótkim keledi. Olar: meditsina qyzmetkerleri, meditsinalyq uiymdarda dispanserlik esepte turǵan balalar, jetim balalar jáne ata-anasynyń qamqorlyǵynsyz qalǵan balalar jáne basqalary. Buǵan qosa, jumys berýshilerdiń jáne halyqtyń jeke qarajaty esebinen de vaktsinatsiia júrgiziledi», - dedi Marat Shoranov.
Onyń aitýynsha, reseilik vaktsinadan bólek Qazaqstan aýmaǵynda taǵy 3 óndirýshiniń 4 vaktsinasy tirkelgen. Atap aitqanda, Sanofi-Paster (Frantsiia) óndirgen «Vaksigrip Tetra», Infliývak (Niderlandy) men Sinovak Biotek (Kitai) kompaniialary óndirgen vaktsinalardy da alýǵa bolady.
