QR Densaýlyq saqtaý ministrliginiń bas onkolog-dárigeri, Qazaq ulttyq onkologiia jáne radiologiia institýtynyń direktory Diliara Qaidarova Qazaqstanda sút beziniń qaterli isigimen aýyratyndar qatary jasaryp bara jatqanyn málim etti, dep habarlaidy QazAqparat.
«Biz halyqqa obyr aýrýlaryn anyqtaityn tekseristerge, skriningterge kelińizder dep, aldyn alý jumystaryn barynsha nasihattaimyz. Ómirińizdiń bir kúnin tekseriske arnańyz. Sút beziniń qaterli isigi qazir elimizde jasaryp barady. Bul dertke 32 jasynda, tipti 28 jasynda shaldyqqandar kezdesti. Sol sebepti, tegin tekseristen ótý jasyn 50-den 40 jasqa deiin tómendettik. Iaǵni, osy jastaǵy áielder kez kelgen klinikaǵa kelip, tegin mammografiiadan óte alady. Mammograftar barlyq jerde bar», - dedi Diliara Qaidarova Onkologiiadaǵy Dúniejúzilik kóshbasshylar sammitinde tilshilerge bergen suhbatynda.
Bas onkolog-dárigerdiń aitýynsha, sút beziniń qaterli isigi búkil álem elderinde jasaryp barady. Adamnyń ýaiym-qaiǵyda bolýy, durys tamaqtanbaýy, DNK-nyń ózgerýine alyp keletin dári-dármekti qabyldaýy men jaisyz ekologiianyń keselinen áielder bul aýrýǵa shaldyǵýy ábden múmkin.
Aita ketsek, buǵan deiin Diliara Qaidarova ata-ananyń ruqsatymen balalarǵa jatyr moiny qaterli isigine qarsy vaktsinatsiia júrgiziletinin málim etken bolatyn.
