Elimizde salyq tólenbei jalǵa beriletin 12 myń páter anyqtaldy. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy QazAqparat.
«Osy jyldyń qyrkúiek aiynan jeltoqsanǵa deiin júrgizilgen «Ýchaske» jedel aldyn alý is-sharasy aiaqtaldy. Ol quqyq buzýshylyqtardyń aldyn alýǵa, sondai-aq halyq qaýipsizdiginiń problemalyq máselelerin zerdeleýge jáne odan ári sheshýge baǵyttalǵan. Operatsiia kezinde ýchaskelik politsiia inspektorlary bekitilgen ákimshilik ýchaskelerde halyqpen tanysý, qarý ielerin, ishki ister organdarynda esepte turǵan sheteldikter men azamattardy tekserý úshin aýlalardy jáne páterlerdi aralap shyqty. Sonymen qatar, problemalyq máselelerdi zertteý jáne sheshý úshin turǵydarmen kezdesýler ótkizildi», - dedi resmi ókil IIM baspasóz alańynda ótken brifing barysynda.
Onyń atap ótýinshe, aldyn alý is-sharasynyń 2 aiynda politsiia qyzmetkerleri 5 millionǵa jýyq páter men jeke úilerdi aralap, 300 myńnan astam saiajai men 60 myńǵa jýyq sharýa qojalyǵyn, qystaq, sharýashylyq oryndaryn tekserdi.
«Jalǵa beriletin 100 myńǵa jýyq páter tekserildi. Tekserý barysynda Memlekettik kirister organdarynda tirkelmegen turǵyn úidi jalǵa berýdiń 12 myńǵa jýyq faktisi anyqtaldy», - dedi Nurdildá Oraz.
