Bilim jáne ǵylym ministri Ashat Aimaǵambetov barlyq oblysta pedagogtardyń quqyǵyn qorǵaý jónindegi keńester ashylyp jatqanyn aitty, dep habarlaidy QazAqparat.
«2020 jyly bilim berý salasynda jáne onyń barlyq deńgeiinde sapaly ózgerister boldy. Desek te, jetistikter de, kemshilikteri de bar. Birinshiden, «Pedagog mártebesi týraly» zańynyń aiasynda pedagogtardyń eńbek jaǵdailary jaqsartylyp keledi. Pedagogtardy tán emes qyzmetterge ári kózdelmegen esepterge tartýdan bosatý sharalary qabyldandy. Sonymen qatar, barlyq oblysta pedagogtaryń quqyqtaryn qorǵaý jónindegi keńester ashyla bastady. Biyl bul jumysty sońyna deiin jetkizemiz», - dedi A. Aimaǵambetov Bilim ministrliginiń alqa májilisinde.
Onyń aitýynsha, Memleket basshysynyń bergen tapsyrmasy aiasynda 2024 jylǵa qarai pedagogtardyń jalaqysy 2 ese artady.
«Osy qadamdar mektepterdi kadrlarmen tolyq qamtýǵa etýge múmkindik beredi. Taǵy bir mańyzdy másele - pedagogtardy jumysqa qabyldaý endi konkýrs arqyly naqty biliktilik kórsetkishterine sáikes júrgiziledi jáne de ony elektrondy formatqa kóshiremiz. Osyǵan qosa 2021 jyldan bastap pedagogikalyq mamandyq boiynsha jumysqa alǵash ret turý úshin úmitkerler kásibi sheberligi turǵysynda sertifikattaýdan ótedi. Iaǵni diplomǵa qosa, kvalifikatsiia alý mindeti engiziledi», - dedi vedomstvo basshysy.
Budan buryn habarlanǵandai, vedomstvo basshysy balalardyń qaýipsizdigin qamtamasyz etý maqsatynda barlyq óńirde mektepterdi beinebaqylaý júiesimen 100 paiyz, jyly ájethanalarmen 99 paiyz qamtamasyz etilgenin aitty.
