Qazaqstanda órt saldarynan adamnyń mert bolý kórsetkishi ósken. Bul týraly QR TJM Órtke qarsy qyzmet komiteti basqarmasynyń basshysy Erlan Tóregeldiev málim etti, dep habarlaidy QazAqparat.
«Jyl basynan beri elimizde 7 515 órt jaǵdaiy tirkelip, tilsiz jaýdan 1 018 adam qutqaryldy. Ókinishke qarai 251 adam qaitys boldy. Sonymen qosa 217 adam túrli dárejedegi kúiik aldy jáne ýlanyp qaldy. Ótken jylmen salystyrǵanda jalpy órt sany 7%-ǵa tómendegen, biraq onyń saldarynan adamnyń qaza tabýy 20%-ǵa, al jaraqat alý 18%-ǵa ósip otyr. Órt jii oryn alatyn ol turǵyn úi sektory, biyl 4 300-den astam órt boldy, bul elimiz boiynsha órt jaǵdaiynyń 58%-y quraidy», - dedi E. Tóregeldiev OKQ-de ótken baspasóz máslihatynda.
Sondai-aq, TJM ókili órt qaýipsizdigi baǵytynda atqarylǵan jumys nátijesine toqtalyp ótti.
«Sońǵy 2 jylda atqarylǵan jumystar áleýmettik osal toptqa jatatyn azamattardyń úilerinde oryn alatyn órt sanynyń aitarlyqtai tómendegenin kórsetti. Statistikaǵa súiensek, 18 paiyzǵa deiin tómendegen. Máselen, 2019-2020 jyldardaǵy jylý berý maýsymynda atalǵan sanattaǵy úilerde 354 órt bolsa, 2020-2021 jylǵy jylý berý kezeńinde barlyǵy 19 órt jaǵdaiy tirkelgen. Sonymen qatar turǵyn úi sektorynda adamdardyń gazdan nemese tútinnen ýlaný kórsetkishi de 28 paiyzǵa azaiǵany baiqalady», - deidi ol.
