Qazaqstanda balalardyń qaýipsizdigin qamtamasyz etý maqsatynda mektepterdi táýlik boiy arnaiy kúzet qyzmetiniń qadaǵalaýyna berý máselesi qaralyp jatyr. Bul týraly QR Bilim jáne ǵylym ministrliginiń Balalar quqyqtaryn qorǵaý komiteti tóraǵasynyń orynbasary Dýlat Jekebaev málim etti, dep habarlaidy QazAqparat tilshisi.
«Qazan, Permde bolǵan jaǵdai bizge de kez kelgen qaýipke daiar bolýdyń qajettigin kórsetti. Balalar qaýipsizdigin qamtamasyz etýde mektep kúzetine qoiylatyn talap joǵary. Kúzet qyzmeti tótenshe jaǵdaiǵa árdaiym daiyn bolyp, shuǵyl sheshim qabyldai bilýi tiis. Bul degenimiz beinebaqylaý kamerasynyń ornatylyp, onyń talap pen standartqa sáikes jumys isteýi. Osy oraida biz halyqaralyq tájiribe men ózge elderde bolyp jatqan tótenshe jaǵdailarǵa taldaý júrgizýdemiz», - dedi Dýlat Jekebaev «Kazakhstan Security Systems -2021» atty respýblikalyq konferentsiia barysynda.
Onyń aitýynsha, keibir mektepterdegi beinebaqylaý kamerasy tiisti talap pen standartqa sáikes kelmeidi.
«Memleket basshysynyń tapsyrmasyna sai, bizdiń ministrlik quzyrly organdarmen birlesip mektep qaýipsizdigin táýlik boiy qadaǵalaityn arnaiy kúzet qyzmetimen qamtý máselesi qaralyp jatyr. Sonymen qatar, barlyq bilim berý mekemelerinde «dabyl batyrmasyn» ornatý da kún tártibinde. Atalǵan sharalar biýdjetten qosymsha 2 mlrd teńge qarjyny talap etedi. Osy oraida búginde quqyqtyq-normativtik aktige qaita ózgerister engizilip jatyr», - deidi ol.
