Ishki ister ministrligi eńbek demalysy maýsymy bastalýyna bailanysty qazaqstandyqtardy jol erejesin muqiiat saqtaýǵa shaqyryp otyr, dep habarlaidy "Ult aqparat".
«Eńbek demalysy kezeńi kelisimen avtokólik qozǵalysynyń jiiligi ósip otyr. Sonyń áserinen kólikten keletin qaýip-qater artty. Keiingi 2 aptada 428 jol-kólik oqiǵasy kezinde 88 adam kóz jumyp, taǵy 505 adam jaraqat aldy. Onyń ishinde 92 kólik apatynda kámelet jasyna tolmaǵan 8 bala qaitys bolyp, 102-si zardap shekti. Qaitys bolǵandar men zardap shekkenderdiń úshten biri – jaiaý júrginshiler», - dep atap ótti Ishki ister ministrliginiń resmi ókili Nurdildá Oraz onlain brifingide.
Vedomstvo ókili tirkelip jatqan jol apattarynyń negizgi sebepterine toqtaldy.
«Atalǵan jol-kólik oqiǵalarynyń basty sebebi – júrgizýshiler men jaiaý júrginshilerdiń jol erejesin saqtamaýy. Qala syrtyndaǵy joldarda bolatyn apattardyń kisi ólimi kórsetkishi joǵary. Mundaǵy basty sebep – júrgizýshilerdiń jyldamdyq rejimin saqtamaýy jáne qarsy baǵytpen júrýi. Al eldi meken aýmaqtarynda bolatyn apattardyń negizgi sebebi – jaiaý júrginshi jolaǵyn kesip ótý erejesiniń buzylýy jáne jyldamdyqty arttyrý. Osyǵan bailanysty Ishki ister ministrligi jol qozǵalysy erejesin saqtaý qajettigin eske salady», - dedi Nurdildá Oraz.
