Májilis Tóraǵasy Nurlan Nyǵmatýlin áleýmettik kásipkerlik máselesi zań deńgeiinde rettelip, onyń mártebesi naqty aiqyndalýy tiis ekenine nazar aýdardy, dep habarlaidy "Ult aqparat".
Búgingi jalpy otyrysta depýtattardyń bastamasymen ázirlengen áleýmettik kásipkerlikti damytý máseleler týraly zań jobasy I oqylymda maquldandy.
Qujatqa sáikes, sýbektini áleýmettik kásipkerler tizilimine engizý týraly sheshimdi óńirlik komissiia qabyldaityn bolady. Onyń quramyna kimder kiretinin jáne onyń jumysynyń ashyqtyǵyn qamtamasyz etý qalai josparlanyp otyrǵanyn depýtattar nazarǵa aldy.
«Qandai komissiia, qandai kásipker bolsa da ol jergilikti halyqtan artyq bilmeidi. Sondyqtan, bul komissiiaǵa qoǵamdyq ókilderdiń kirgeni durys» – dedi Májilis Tóraǵasy.
Palata Spikeriniń aitýynsha, zań jobasy «áleýmettik kásipkerlik» uǵymyn, biznes sýbektilerin kásipkerliktiń osy túrine jatqyzý sanattaryn anyqtap, áleýmettik kásipker kómektesetin nemese onyń kásipornynyń shtatynda bolýy tiis halyqtyń áleýmettik osal toptarynyń tizbesin naqtylaidy.
Nurlan Nyǵmatýlinniń pikirinshe, osynyń bári biznestiń áleýmettik mańyzdy baǵytyn damytýǵa maqsatty memlekettik qoldaý kórsetýge múmkindik beredi.
Jalpy otyrys barysynda Májilis Tóraǵasy óńirlik komissiia tizilimge engizý úshin áleýmettik kásipkerlerdiń ótinimderin jinaitynyn atap ótip, osy tizilimde turǵan kásipkerlerdiń qosymsha eki túri boiynsha salyq jeńildikteri bolatynyna (bul múlik salyǵyn tómendetý, sondai-aq salyq salynatyn kiristi azaitý) toqtaldy.
Jalpy zań jobasynda áleýmettik kásipkerliktiń uǵymdary men negizgi mindetterin bekitý, qandai da bir uiymdy áleýmettik kásipkerlik sýbektilerine jáne áleýmettik kásipkerlik sýbektileriniń qyzmeti baǵyttalǵan halyq sanattaryna jatqyzý ólshemsharttaryn aiqyndaý kózdeledi.
