Ulttyq agrarlyq ǵylymi bilim berý ortalyǵynyń basqarma tóraǵasy Tóleýtai Raqymbekov Qazaqstanda agrarlyq ǵylymdy qarjylandyrý tártibin ózgertýdi usyndy, dep habarlaidy QazAqparat.
«Jalpy elimizde agrarlyq ǵylymdy qarjylandyrý tártibin ózgertý kerek. Tájiribe kórsetip otyrǵandai, daiyndyq jumystaryna 2 jyldai ýaqyt kerek. Tarqata aitqanda, basty injenerlik jospardy ázirleýge 3 ai, ony aýyl sharýashylyǵy ministrliginde maquldaýǵa 3 ai, qarjylyq-ekonomikalyq negizdemeni ázirlep, oǵan memlekettik-jekeshelik áriptestik ortalyǵynda bekitýge taǵy 12 ai ýaqyt ketedi. Oǵan qosa biýdjettik protsedýralar men respýblikalyq biýdjetti qabyldaýǵa deiin taǵy 9 ai kerek», - dedi Tóleýtai Raqymbekov Parlament Májilisinde agrarlyq ǵylymdy, bilim jáne óndiristi integratsiialaý máseleleri boiynsha otyrysta.
Onyń aitýynsha, basty injenerlik jospar ázirlenip, respýblikalyq biýdjet bekitilgenshe tehnika men qurylǵylardyń baǵasy qymbattap ketetinin jetkizdi.
Ulttyq agrarlyq ǵylymi bilim berý ortalyǵynyń basshysy atap ótkendei, keiingi eki jylda agrarlyq ǵylymdy qarjylandyrý kólemi úsh ese artyp, ártúrli qarajat kózderinen bul baǵytta 17,5 mlrd teńge bólingen. Osylaisha, jalpy ishki ónimniń ǵylymǵa bólinetin úlesi 0,12 paiyzdan 0,35 paiyzǵa artqan. AÓK-ti damytýdyń memlekettik baǵdarlamasyna sáikes, 2021 jylǵa qarai bul úles JIÓ-niń 0,5 paiyzyna teńesýi tiis. Al 2030 jylǵa qarai JIÓ-niń 1 paiyzy ǵylymǵa bólinedi.
