«Mektep sporty federatsiiasy» ZTB resmi ókili Áliia Túsipbekova balalar-jasóspirimder sportyn damytý salasyndaǵy basty problemalardy atady, dep habarlaidy QazAqparat.
«Qazaqstandaǵy sport úiirmeleri oqýshylardy álemniń ortasha kórsetkishimen salystyrǵanda 4 ese az qamtidy. Onyń ústine 1970 mektepte sport zaly joq. 1991 jyldan beri elde 9 myń sporttyq qurylym men bilim uiymynyń nysany salyndy. Al 1998 jyldan beri olardyń taǵy 2 myńnan astamy boi kóterdi. Qazir onyń 31 paiyzy qanaǵattanarlyq jaǵdaida emes. Aýyl oqýshylarynyń sporttyq qurylym boiynsha suranysy 30 paiyzǵa ǵana qanaǵattandyryldy. Sol sebepti balalar sportyn damytamyz desek, osy máselelerge kóbirek kóńil bólýimiz kerek», - dedi Áliia Túsipbekova OKQ-da ótken baspasóz máslihatynda.
Sonymen birge onyń aitýynsha sporttyń naqty túrleri boiynsha jattyǵýlardy uiymdastyrý úshin bilikti kadrlar men qajetti quraldar jetispeidi.
«Aýyl mektepterinde sport dobyna deiin tapshy. Biyl Mektep sporty federatsiiasy osyndai 1000 mektepke basketbol, voleibol jáne fýtbol doptaryn taratty. Kelesi jyly bul jumys jalǵasyn tabady. Memleket balalar men jasóspirimderge qaitarymsyz sipatta dene shynyqtyrý men sportpen ainalysý jumysyn uiymdastyrý qyzmetterin tolyǵymen usynyp jatqan joq», - dedi spiker.
Áliia Túsipbekova Mektep sporty federatsiiasy aimaqtardaǵy bilim uiymdaryna tiisti hat joldaǵanyn habarlady.
«Ókinishke qarai, Almaty men Nur-Sultan qalasy ǵana bul suranysymyzǵa oń jaýabyn berdi. Aqtóbe oblysy jańashyldyq kerek emes dep hatty qaraýsyz qaldyrdy. Jambyl oblysy da sol. Balalardy sportqa tartý úshin konstrýktivti sheshimder kerek. Bárin basshylardan bastaǵan durys. Bul baǵytta jumys júrgizilip jatyr desek te, jetkilikti deńgeide dep aita almaimyz», - dep túidi ol.
