«Jýsan» gýmanitarlyq operatsiiasy Siriia elindegi oq pen ottyń ortasynda qalǵan qandastarmyzdy otanyna qaitarýda. Ony elimizdiń Ulttyq qaýipsizdik komiteti men memlekettik organdary halyqaralyq áriptesterimen birlesip atqaryp jatyr. Qazir elge oralǵandardyń alǵystan basqa aitarlary joq. Bári qaitadan baqytty ǵumyr keshýge árkettenip jatyr.
Saltanat - Siriiany jumaq sanap ketken kóptiń biri. Alaida senimi aqtalmady. Ashtyq pen soǵystyń ortasyna túsip, ómiri sergeldeńge ainaldy. Eń soraqysy, baýyr eti balasynan aiyryldy. Endi aman qalǵan ul-qyzdaryn Qazaqstanda ósirip, otanyna adal azamat etip tárbieleýge nietti.
«Qyzdar kúlip, bes jyldan keiin ómirińdi qalai elestetesiń dep suraidy. Men tolyq em alyp, tabysty biznes-ledi bolamyn. Jeke avtokóligim, kásibim bolady dep jaýap qaitardym», - deidi Saltanat.
Sham elinde Saltanat mynany túsinipti. Óz eliń men jurtyńdy súiýiń kerek. Ózgeler de seni qurmettep syilasyn deseń, ósek-ótirikten aýlaq bolý mańyzdy. Sebebi ol jaqsylyqqa aparmaidy.
«Meniń Siriiadaǵy bes jyl ómirim óksikpen, ókinýmen ótti. Men sharasyz kúide qaldym. Joldasym ózin-ózi jaryp jiberdi. Úlken ulym aýyr dertke shaldyǵyp sol jaqta qaitys boldy. Kim biledi, eger kúieýime senip sol jaqqa barmasam ulym aman-esen janymda júrer edi ǵoi. Ony emdete almadym, aiyrylyp qaldym», - dep jylady ol.
«Jýsan» operatsiiasy týraly estigen Saltanat, qalyp qalmaiyn dep lagerge úsh kún boiy toqtamai jaiaý júrip jetken.
«Qazaqstanǵa qaitaramyz degendi estigende qýanyshtan jyladym. Sol kóshten qalyp qoimaiyn dep lagerge barynsha asyǵyp keldim. Balalaryma: «Sál shydasańdar, elge oralamyz, qiyn kúnderimiz artta qalady. Tek shydamdylyq tanytyp, meniń aitqanymdy isteńder», - dedim. Úsh kún jaiaý júrip keldik. Allaǵa shúkir, qazir óz elimizdemiz», - dedi Siriiadan oralǵan kelinshek.
Qazir Saltanat balalarymen birge ońaltý ortalyǵynda. Onymen arnaiy mamandar jumys istep jatyr.
«Siriiadan kelgendermen psiholog, teologtar jumys istep, qoǵamǵa daiyndap jatyr. Syrtta júrip, umytyńqyraǵan ana tilin de osy jerde úiretedi. Munda kelgenderdiń kóbi tuiyqtalyp qalǵan. Ondaǵy ómir týraly múlde aitqylary kelmeidi. Óitkeni azapty kúnder keshken. Soǵysta júrip jas kelinshekter baýyr eti balasynan aiyrylǵan. Olardyń jan dúniesin emdeý úshin barymyzdy salamyz», - deidi psiholog Roza Aitjanova.
Alǵashqy lekpen Otanǵa oralǵandardyń kóbisi jumysqa ornalasty. Balalaryna qujat alyp, balabaqshaǵa berip jatyr. Aita ketý kerek, «Jýsan» operatsiiasy sharapaty mol sharaǵa ainaldy.
