Qazaqstannyń birinshi raketkasy Elena Rybakina úzdik 20 tennisshiniń qataryna kirdi, dep habarlaidy "Ult aqparat".
Búgin jańartylǵan WTA reitingisinde 20 jastaǵy qazaqstandyq tennisshi 25-ten 19-orynǵa kóterildi.
Bul Qazaqstan úshin rekordtyq kórsetkish bolyp sanalady. 2012 jyly 29 qazanda Iaroslava Shvedova 25-raketka atanǵan edi.
Taǵy bir qazaqstandyq Iýliia Pýtintseva 34-ten 32-ge joǵarylasa, Zarina Diias burynǵy 63-ornynda qaldy.
Álemdik reiting kóshin burynǵysha aýstraliialyq Eshli Barti bastap keledi. Rýmyniialyq Simona Halep ekinshi, chehiialyq Karolina Plishkova úshinshi orynda.
Erler arasynda Qazaqstannyń birinshi raketkasy Aleksandr Býblik 56-dan 55-ke kóterilse, Mihail Kýkýshkin 67-den 69-ǵa syrǵydy. Dmitrii Popko 173-ten 168-ge shyqty.
Munda serbiialyq Novak Djokovich kósh tizginin ustasa, ispaniialyq Rafael Nadal ekinshi, shveitsariialyq Rodjer Federer úshinshi orynda tur.
Eske sala keteiik, budan buryn E.Rybakinanyń Sankt-Peterbýrg týrniriniń finalynda ese jibergenin jazǵan bolatynbyz.
E.Rybakinanyń premer deńgeiindegi taǵy bir týrnir – búgin bastalatyn Dýbai dodasynda sátti óner kórsetse, reitingisin odan saiyn jaqsartatyndai múmkindigi bar. Bul jarystyń alǵashqy ainalymynda ol álemniń 7-raketkasy, biylǵy Aýstraliia ashyq chempionatynyń jeńimpazy, amerikalyq Sofiia Keninmen kúsh synasady.
