Qazaqstandyq álem chempiony Eldos Smetov Tashkentte ótip jatqan Grand Slam týrniriniń kúmis júldegeri atandy, dep habarlaidy "Ult aqparat".
Rio olimpiadasynda kúmispen kúptelgen Smetov 60 kelide finalda japoniialyq, álem chempionatynyń eki dúrkin júldegeri Riýdziý Nagaiamamen tatamige shyqty.
Qarsylastar buǵan deiin ózara bir ret kezdesip, 2019 jyly álem birinshiliginde Eldos utylyp qalǵan edi.
Dúniejúzilik reitingte kósh bastap kele jatqan japoniialyq dziýdoshy bul joly da shiraq qimyldap, vazari ádisimen jeńiske jetti.
Jarys barysynda Eldos shirek finalda grýziialyq Jaba Papinashvilidi qosymsha ýaqytta jeńdi. Odan keiin jartylai finalda ázirbaijandyq Karamat Hýseinovty vazari ádisimen joldan taidyrdy.
Taǵy bir qazaqstandyq Erlan Serikjanov 66 kg salmaqta qola júlde úshin reseilik Aram Grigorianmen beldesedi. Ol jubanysh kezdesýinde sloveniialyq Matej Poliakty tize búktirdi.
