QR Premer-Ministri Asqar Mamin eldegi 22 ýniversitetti Nazarbaev Ýniversiteti úlgisine kóshirýdi tapsyrdy, dep habarlaidy QazAqparat.
Premer-ministr Úkimet otyrysynda Bilim jáne ǵylym ministrligine birqatar tapsyrma berdi.
«Birinshi. Bilim berýdi damytýdyń 2025 jylǵa deiingi tujyrymdamasynda joǵary bilimniń sapasyn qamtamasyz etý boiynsha naqty sharalar men indikatordy qarastyrý qajet.
Ekinshi. Qarjy, Ulttyq ekonomika jáne múddeli memlekettik organdarmen birlesip, biylǵy 22 qarashaǵa deiin Joǵary oqý oryndarynyń básekege qabilettiligin arttyrý boiynsha 2021-2025 jyldarǵa arnalǵan jol kartasyn pysyqtap, Úkimetke engizsin», - dedi Asqar Mamin.
Sondai-aq, ol Petropavl men Shymkentte Nazarbaev Ýniversiteti úlgisinde 2 joǵary oqý ornyn ashýǵa qarjy qarastyrý kerektigin atady.
«Myqty degen 20 óńirlik ýniversitetti, Petropavl men Shymkentte «Nazarbaev Ýniversiteti» úlgisinde 2 joǵary oqý ornyn ashýdy qarjylandyrý máselesin pysyqtaý kerek. Sheteldik jáne qosdiplomdy baǵdarlamalardy, oqytýshylar men stýdentterdiń akademiialyq utqyrlyǵyn damytý jumysyn jalǵastyrý qajet», - dedi Premer-Ministr.
Sonymen qatar, Úkimet basshysy Bilim jáne ǵylym ministrligine múddeli memlekettik organdarmen birlesip, ǵylym men joǵary bilimniń biryńǵai tsifrlyq platformasyn qurýdy pysyqtaýdy tapsyrdy.
Bul jumystyń bárin baqylaý vitse-premer Eraly Toǵajnovqa júkteldi.
