Foto: primeminister.kz
QR Premer-Ministri Álihan Smaiylovtyń tóraǵalyǵymen ótken Ekonomikany demonopolizatsiialaý jónindegi komissiianyń otyrysynda respýblikanyń birqatar jylý-elektr ortalyǵynyń (JEO) qyzmetin tekserý qorytyndysy qaraldy, dep habarlaidy "Ult aqparat" primeminister.kz saityna silteme jasap.
Prokýratýra organdary 11 jekemenshik JEO-da jylý-energetika jáne tabiǵi monopoliialar salasyndaǵy zańnamanyń saqtalýyna tekserý júrgizdi. Tekserý barysynda keibir nysanda júieli kemshilikter men zań buzýshylyqtar anyqtaldy. Ár stantsiiada qondyrǵylardyń ábden tozyǵy shyqqan, bul jylý berý maýsymynda apattarǵa ákelýi múmkin.
Talqylaý qorytyndysy boiynsha ýákiletti organdarǵa stantsiialarda kúrdeli jóndeý men modernizatsiialaýdy qamtamasyz etý boiynsha menshik ielerimen jumys jasaý tapsyryldy. Úkimet basshysy 2023-2024 jyldarǵa arnalǵan naqty jumys kestesin belgilep, onyń oryndalýyn baqylaýdy talap etti. Mindettemeler buzylǵan jaǵdaida stantsiialardy memleket menshigine qaitarý sharalary qabyldanatyn bolady.
Sondai-aq komissiia otyrysynda elimizdiń iri ónerkásip kásiporyndaryn gazben qamtamasyz etý salasyndaǵy tiimsiz monopolist deldaldardy joiý máselesi de talqylandy. Tiisti infraqurylymy bar bul kompaniialardaǵy memlekettik úlester kezinde arzandatylǵan baǵamen jeke qolǵa ótken. Nátijesinde bul gaz tasymaldaý naryǵynyń monopoliialanýyna jáne qyzmet kórsetý tarifteriniń kóterilýine alyp keldi.
Álihan Smaiylov ýákiletti vedomstvolarǵa osy aktivterdi QR zańnamasynyń talaptaryna sai memleket menshigine qaitarý máselesin jedel pysyqtaýdy tapsyrdy.
