Keshe, 8 qazanda Qazaqstanda 1940 adamnyń analizinen koronavirýs anyqtaldy. Bul aldyńǵy kúnmen salystyrǵanda 44 adamǵa kóp. Keiingi aptalarda kúnine eki myń tóńireginde naýqas anyqtalyp júr. Densaýlyq saqtaý ministrligi tamyzdan beri elde indettiń báseńdep kele jatqanyn aitqan. Jazda shildede indet ýshyǵyp, kúnine tirkeletin naýqastar 8 myńǵa deiin jetken.
Ótken táýlikte Almatyda – 369, Nur-Sultan qalasynda – 294, Almaty oblysynda – 188, Qaraǵandy oblysynda – 161, Pavlodar oblysynda - 165, Soltústik Qazaqstan oblysynda – 129, Shyǵys Qazaqstan oblysynda 102 adamnan koronavirýs anyqtalǵan. Qalǵan qalalar men oblystarda ondaǵan naýqas tirkelgen.
2020 jyldyń naýryz aiynan beri 902 myń adamnyń koronavirýs testi oń shyqqan. 843 myńy jazylǵan. 11 489-y qaitys bolǵan. 7 qazanda 30 adam koronavirýstan kóz jumǵan.
Pnevmoniianyń koronavirýsqa uqsas túrin Qazaqstan biligi halyqaralyq uiymdardyń qysymynyń nátijesinde 2020 jyldyń 1 tamyzynan bastap esepke ala bastaǵan. Byltyr Qazaqstanda jazda jii kezdespeitin ókpeniń qabynýy órshigen kezde DDSU "ólim qaýpi joǵary qazaqstandyq pnevmoniia" – durys anyqtalmaǵan Covid dep málimdegen.
Sodan beri resmi málimet boiynsha, 77 myńnan astam adam koronavirýs pnevmoniiasyna shaldyqqan. 7 qazanda bul diagnoz 150 adamǵa qoiyldy. 2020 jyldyń 1 tamyzynan beri "pnevmoniia" 4900 naýqas ólimine sebepshi bolǵan. 13-i eki kún buryn kóz jumǵan.
Qazir respýblika boiynsha 54 myńǵa jýyq naýqas koronavirýstan emdelip jatyr. 9,4 myń naýqas statsionarda jatyr.
Qazir 6,8 million adam koronavirýsqa qarsy vaktsinanyń tolyq dozasyn alǵan. 1 mln adam ekinshi dozasyn kútip otyr. Ministr Aleksei Tsoi elge batys kompaniialary ázirlegen Pfizer vaktsinasy tórtinshi toqsanda jetkiziledi dep habarlaǵan. Ol negizinen 12 jastan bastap balalar men jasóspirimderge, júkti áielderge salynýy tiis.
Qazir Qazaqstanda 18 ben 65 jas aralyǵyndaǵy adamdarǵa reseilik "Spýtnik V" (qazir ony Qaraǵandyda óndiredi), qazaqstandyq QazVac, qytailyq Sinopharm kompaniiasynyń BAÁ-de óndirilgen Hayat-Vax pen Qytaida óndirilgen Vero Cell ekpesi, sonymen birge taǵy bir qytailyq Sinovac kompaniiasynyń CoronaVac ekpesi salynyp jatyr.
Amerikalyq Djons Hopkins ýniversitetiniń málimetinshe, álemde 237 millionnan astam adamǵa koronavirýs juqqan, 4,8 milliony qaitys bolǵan.
