Elbasy Jańa jylǵa arnalǵan merekelik keshke qatysty, dep habarlaidy "Ult aqparat" Aqordaǵa silteme jasap.
Nursultan Nazarbaev qaiyrymdylyq keshine qatysýshylarǵa arnaǵan sózinde ótip bara jatqan jyl búkil elimiz úshin jemisti bolǵanyn atap ótti.
– Álemde elimizdiń bedeli aitarlyqtai nyǵaia tústi. Qazaqstanǵa tartylǵan investitsiia kólemi 17,5 paiyzǵa artty. Jalpy, ekonomikamyz 4 paiyzdan astam ósti. Bul – birlese atqarǵan jumysymyzdyń nátijesi. Sondyqtan, barlyǵyńyzǵa alǵys aitamyn, – dedi Qazaqstan Prezidenti.
Sonymen qatar, Memleket basshysy aldaǵy jyly elimizdi odan ári damytýǵa septigin tigizetin kóptegen sharalar ótetini jóninde aitty.
– 2019 jyldan bastap eń tómengi jalaqy 1,5 ese ósedi. Bul 1,3 million adamdy qamtityn bolady. Biliktiligin rastaǵan muǵalimderdiń eńbekaqysy 30 paiyzdan 50 paiyzǵa deiin kóbeiedi. Quqyq qorǵaý organdarynyń qyzmetin jaqsartýdy kózdeitin jumystar atqarylady. Týrizmdi ilgeriletý úshin de sharalar qabyldanady, – dedi Elbasy.
Nursultan Nazarbaev keler jyly jastardyń áleýetin damytýǵa erekshe mán beriletinin aitty.
– Jastarǵa arnalǵan arnaiy memlekettik baǵdarlama tórt mindetti júzege asyrýǵa baǵyttalady. Bul – bilim berý, baspanamen qamtamasyz etý, densaýlyq saqtaý jáne patriottyq tárbie berý máseleleri. Búgingi jumystardyń bári bolashaǵymyz úshin jasalýda. Jastardyń basty ómirlik baǵdary elimizdiń táýelsizdigi bolýǵa tiis, – dedi Memleket basshysy.
Sońynda Elbasy sharaǵa qatysýshylardy kele jatqan Jańa jylmen taǵy da quttyqtap, barsha qazaqstandyqtarǵa zor densaýlyq, baq-bereke men tabys tiledi.
Jańa jylǵa arnalǵan keshti ótkizýden túsken qarajat qaiyrymdylyq maqsatqa jumsalatyn bolady.
