Qazaqstannyń Tuńǵysh Prezidenti «Atameken» tarihi-mádeni ortalyǵynda Shamalǵan aýylynyń turǵyndarymen júzdesti.
– Týǵan aýylyma kelgen saiyn árqashan balalyq shaǵymdy jyly sezimmen eske alamyn. Meniń júrip ótken jolym ońai bolǵan joq, memleketimizdiń ilgerileýi men órkendeýi úshin kóp eńbek ettim. Sharshaǵan kezderimde ákem ekeýimiz jii serýendegen Shamalǵannyń kósheleri men taý bókterlerin esime alatynmyn. Sol sátte-aq sharshaǵanym basylady, – dedi Elbasy.
Qazaqstannyń Tuńǵysh Prezidenti júrgizilip jatqan saiasattyń arqasynda elimizdiń halyqaralyq arenada moiyndalǵanyn atap ótti.
– Biz úlken jumys atqardyq. Buryn eshkimge belgili bolmaǵan Qazaqstan búgin búkil álemge tanyldy. Qazaqstandyqtar túrli elderge baryp, dúnie júziniń eń úzdik oqý oryndarynda bilim alý múmkindigine ie boldy, – dedi Nursultan Nazarbaev.
Sondai-aq, Elbasy aldaǵy qyzmeti jónindegi josparlaryna toqtaldy.
– Men Elbasy retinde strategiialyq máselelerge kóńil bóletin bolamyn. Qasym-Jomart Toqaev meniń artqan úmitimdi aqtaidy dep senemin, – dedi Qazaqstannyń Tuńǵysh Prezidenti.
Nursultan Nazarbaev elimizdi jańǵyrtý jóninde qabyldanyp jatqan sharalar, eń aldymen, jastardy qoldaýǵa jáne olardyń damýyna baǵyttalǵanyn atap ótti.
– Men Qazaqstannyń bolashaǵy jarqyn bolatynyna senemin. Ol úshin barlyq jaǵdai jasalǵan. Kim biznes ashqysy kelse, oǵan nesie beriledi. Mamandyǵy joq bolsa, memleket oǵan jańa kásiptik bilim beredi. Másele jumystyń joǵynda emes, mamandyqtyń bolmaýynda. Sonymen qatar, biz aýyldardy damytý úshin kóptegen baǵdarlamalardy júzege asyryp jatyrmyz, – dep túiindedi Elbasy.
Sondai-aq, Nursultan Nazarbaev biyl elimizde teńdesi joq áleýmettik sharalar qolǵa alynyp otyrǵanyn atap ótti. Respýblikada azamattardyń turmys sapasyn arttyrý úshin túrli baǵdarlamalar iske asyrylýda. Sonymen birge, Qazaqstannyń Tuńǵysh Prezidenti qoǵamda paternalistik túsinikke jol bermeýdiń mańyzdylyǵyna basa nazar aýdardy.
– Kez kelgen er adamnyń ar-namysy bolýǵa tiis. Bala tárbiesi, eń aldymen, ata-ananyń jaýapkershiligi. Al memleket ata-analardy jumyspen qamtyp, balalaryn asyraýyna jaǵdai jasaýy kerek, – dedi Qazaqstannyń Tuńǵysh Prezidenti.
Sońynda Elbasy kezdesýge qatysýshylarǵa tabys tilep, olardyń jańa belesterdi baǵyndyrýyna niettestik bildirdi, sondai-aq barlyǵyn Otanymyzdyń igiligi úshin eńbek etýge shaqyrdy.
