Elbasy mártebesin alyp tastaýdy kózdeitin zań osy jyldyń sońyna deiin qabyldanady. Bul týraly Májilis spikeri Erlan Qoshanov málimdedi, dep habarlaidy Sputnik Qazaqstan agenttigi.
Májilis kýlýarynda jýrnalister spikerden Tuńǵysh Prezident Nursultan Nazarbaevtyń mártebesine qatysty referendýmda maquldanǵan túzetýler qashan qabyldanatynyn surady.
"Biz kúzde qarastyrýǵa kirisemiz. Jyl sońyna deiin qabyldaýymyz kerek. Prezident bizdiń aldymyzǵa osyndai mindet qoidy", - dedi Qoshanov.
Aitýynsha, Ádilet ministrliginde konstitýtsiialyq jáne basqa da zańdarǵa ózgerister engizý boiynsha jumys toby qurylǵan. Másele osy jumys toby aiasynda qaralady. Zań jobalary ázirge Májiliske túspegen.
Eske salsaq, 5 maýsymda Qazaqstanda konstitýtsiialyq túzetýler boiynsha búkilhalyqtyq referendým ótken bolatyn. Elimizdiń negizgi zańynan "Tuńǵysh Prezident týraly" zańdy joiý arqyly Tuńǵysh Prezident Nursultan Nazarbaevtyń mártebesi týraly erejeler alynyp tastalady.
Sondai-aq qabyldanǵan túzetýlerge sáikes Konstitýtsiianyń 42-babynan Tuńǵysh Prezidentke Memleket basshysy laýazymyna qatarynan eki retten artyq sailaný quqyǵyn beretin ereje alynyp tastalady. Al 46-baptan Tuńǵysh Prezidenttiń mártebesi men ókilettigi Konstitýtsiiamen jáne tiisti Konstitýtsiialyq zańmen aiqyndalatyny týraly tarmaq alynyp tastalady.
Óz kezeginde 91-baptan táýelsiz Qazaqstannyń negizin qalaýshy retinde Tuńǵysh Prezident týraly tujyrym jáne onyń Elbasy (ult kóshbasshysy) mártebesi alynady.
