QR Parlament Senatynyń depýtaty Baqytjan Jumaǵulov Elbasy Nursultan Nazarbaevtyń «Táýelsizdik taǵylymy» atty maqalasyna qatysty pikir bildirdi, dep habarlaidy QazAqparat.
«Táýelsizdigimizdiń 30 jyldyǵynyń qarsańynda Qazaqstan Respýblikasynyń Tuńǵysh Prezidenti - Elbasy Nursultan Ábishuly Nazarbaevtyń «Táýelsizdik taǵylymy» atty maqalasy jariialandy. Babalarymyz armandaǵan eldik pen erkindiktiń simvoly bolyp jalǵasqan uly armany – Táýelsizdik edi. Ulan qaiyr zamandardyń tarihi kartinasyn Elbasy maqalasynan kóresiń. Saqtar men ǵundar, odan soń túrki halqy Uly dalada óz memleketin qurdy. Elbasy daýyldar men dabyldar, «jan alysyp, jan berisken», «egeýli naiza» ustaǵan yqylym zamandardan beri ultymyzdyń baǵa jetpes ózindik dástúrleri men ǵurpyn, erkindiktiń rýhy men rýhani keńistigin, ǵajaiyp tili men sulý sazyn saqtap qalǵan qasietterin tebirene jazady. Ǵasyrlar toǵysynda adamzat tarihynda, onyń ishinde Qazaqstan tarihynda erekshe orny bar Táýelsizdik salmaǵyn kóterý óz taǵdyryna tiesili ekenin joǵary jaýapkershilikpen jetkizedi. Árine, Elbasy júregindegi sóz – tarih sózi, zaman sózi, urpaq sózi», - dep atap ótti B. Jumaǵulov.
Senatordyń aitýynsha, Keńester odaǵynyń tarihi joldaryna sholýdy da osy maqaladan taba alasyń. Ótken ǵasyrdyń 70-shi jyldaryndaǵy jaǵdai, odan keiin Gorbachevtik «qaita qurý» saiasaty da qalai kúiregenin Elbasy ashyq jazady.
«Rasynda, Elbasy jazǵandai, Qazaqstan halqy «bir jaǵadan bas shyǵardy». Ortaq maqsat úshin nebir qiyndyqtardy jumyla jeńdi, ulttyq birlik pen tatýlyqqa qol jetkizdi. Ótken tarih – ketken tarih emes. Ol – ult jadynda, urpaq sanasynda qalatyn qiyn, zobalań jyldarǵa ulasqan tarih bolsa da, babalar armanyn júzege asyrǵan tarih. Maqalada Elbasy halyq rýhyna bas iedi. Qiynshylyqqa kóndi, biraq moiyǵan joq, úmiti úziler jerde – bolashaqqa sendi, keri emes – alǵa júrdi. Uly Otan soǵysy jyldarynda Otan úshin ot keshti. Bul – taǵylymdyq maqala. Bul – Táýelsizdik jolynyń jylnamasy. Otyz jyl boiy Elbasy óziniń búkil ǵumyry men saiasaty halyq taǵdyryn, ult taǵdyryn, táýelsizdikti saqtaýǵa arnalǵanyn eline, jas urpaqqa syr etip aitady. Sonyń nátijesinde Qazaqstan órkenietti 40 eldiń qataryna qosylyp otyr. Maqala ulttyq murattarymyzdy saralaidy. Bolashaq jolymyzdy aiǵaqtaidy. Elbasy júreginen shyqqan sóz tarihilyǵymen, shynaiylyǵymen erekshelenedi. Ózi qurǵan jáne qalyptastyrǵan Táýelsizdik qundylyqtarynyń ulttyq biregeilik pen ulttyq tatýlyq simvoly retinde, tarihi jádiger retinde qala beredi. Elbasy joly – Qazaqstan joly ekenine kóz jetkizesiń», - deidi depýtat.
