QR Aqparat jáne kommýnikatsiialar ministri Dáýren Abaevtyń qatysýymen XV Eýraziialyq mediaforým bastaldy, dep habarlaidy QazAqparat tilshisi.
Forýmnyń ashylýynda Dáýren Abaev Memleket basshysy Nursultan Nazarbaevtyń quttyqtaý hatyn oqyp berdi.
«Búgingi forým media salasyndaǵy bilikti maitalmandardyń ózara dialog júrgizýine múmkindik beretin mańyzdy shara. Álem qubylyp, geosaiasi qaishylyqtar men jańa tehnologiialyq múmkindikter shielenisken qazirgi jaǵdaida buqaralyq aqparat quraldary qaqtyǵystar eskalatsiiasynyń detonatory, sondai-aq halyqaralyq shielenisterdi tejeý men aldyn alýdyń jahandyq faktory bola alady. Osy jerde jýrnalisterdiń jaýapkershiligi shyǵady. Klassikalyq jýrnalistikaǵa basty syn-qater retinde balama aqparat kózderi - blogerler men áleýmettik jelini aitýǵa bolady. Bul rette, dástúrli BAQ-tyń básekege qabilettiligi árdaiym jýrnalistiń kásibiligi men sapaly kontent bolyp keledi. Osy maqsatta osyndai dialog alańdaryn qurýdyń ózektiligi arta túsedi», - delingen Prezidenttiń quttyqtaýynda.
Aita ketý kerek, búgin Almatyda Eýraziialyq media forým bastaldy. Forým alǵash ret ótkizilgen ýaqyttan bastap 15 jylda Qazaqstanǵa 6 myńnan astam sheteldik delegat kelgen. Konferentsiianyń aýqymy men halyqaralyq deńgeii elimizdiń ǵalamdyq aqparat keńistiginiń ajyramas bóligi ekenin bildiredi.
