Elbasy ERG kompaniiasynyń 25 jyldyǵyna arnalǵan saltanatty sharaǵa qatysty. Bul týraly "Ult aqparat" elbasy.kz saityna silteme jasap habarlaidy.
Nursultan Nazarbaev Eýraziialyq top quramyndaǵy kásiporyndar ujymyn kompaniianyń 25 jyldyǵymen quttyqtady.
Qazaqstannyń Tuńǵysh Prezidenti kompaniianyń damý joly el táýelsizdiginiń nyǵaiýymen tyǵyz bailanysty ekenin atap ótti.
Elbasy táýelsizdiktiń alǵashqy jyldary elimizdegi kásiporyndardyń basynan ótkergen qiyndyqtary týraly aitty.
- 1994 jyly kúrdeli jaǵdaida turǵan kásiporyndar búgingi kúni aiaǵyna nyq turdy. Kompaniialar toby 150 myńnan astam jumys ornyn berip otyr. ERG óndiristi damytý jáne keńeitý úshin 13 milliard dollar investitsiia saldy, - dedi Nursultan Nazarbaev.
Sonymen qatar, Qazaqstannyń Tuńǵysh Prezidenti áleýmettik jobalardy iske asyrý baǵytyndaǵy Eýraziialyq toptyń qyzmetin oń baǵalady.
- Sizder áleýmettik baǵdarlamalardy da júzege asyryp jatyrsyzdar. Turǵyn úi, mektepter, aýrýhanalar, sport nysandary jáne basqa da infraqurylymdyq jobalar júzege asýda, - dedi Elbasy.
Sondai-aq, Nursultan Nazarbaev jahandyq syn-qaterlerge toqtalyp, odan ári damý úshin qazaqstandyq kásiporyndarǵa jańa sheshimder qajet ekenin atap ótti.
- Ómir ornynda turmaidy. Barlyǵy alǵa jyljýda. Biz tsifrlyq ekonomika dáýirine aiaq basyp kelemiz. Jasandy intellekt barlyq jerde engizilip jatyr. Munyń bári básekege qabilettilikti saqtaý úshin ozyq tájiribe izdeýdi talap etedi, - dedi Qazaqstannyń Tuńǵysh Prezidenti.
Elbasy ERG kompaniiasynyń myńdaǵan qyzmetkerlerine onyń saiasatyn qoldaǵany úshin alǵys aitty.
- Barlyǵymyz elimizdiń órkendeýi úshin qyzmet etemiz. Eldi bolashaq urpaq úshin damytamyz. Óitkeni, táýelsizdikti jariialaý - bir bólek, al ony saqtap qalý múldem bólek másele. Ol úshin biz ekonomikany damytýymyz kerek. Bul jolda Eýraziialyq toptyń jumysshylary laiyqty úles qosyp keledi, - dedi Nursultan Nazarbaev.
Sóz sońynda Qazaqstannyń Tuńǵysh Prezidenti kompaniianyń barlyq qyzmetkerlerin taǵy da quttyqtap, olarǵa sáttilik pen tabys tiledi.
