Qazaqstan Respýblikasynyń Tuńǵysh Prezidentiniń baspasóz hatshysy Aidos Úkibai Elbasy Nursultan Nazarbaevtyń aimaq basshylarymen ne týraly sóileskeni týraly aqparat taratty, dep habarlaidy QazAqparat.
«Keshe Qazaqstannyń Tuńǵysh Prezidenti ákimderdiń bárimen telefon arqyly sóilesti. Qazirgi jaǵdaiǵa bailanysty áńgimeniń negizgi ózegi – tótenshe jaǵdai kezinde azamattardyń qaýipsizdigin qamtamasyz etý boldy. Nursultan Nazarbaev halyqty qoldaý jumystaryn qyzý júrgizip jatqan volonterler men basqa da azamattardyń densaýlyǵy úshin alańdaýshylyq bildirdi. Aýrýdy juqtyrý qaýpin azaitý úshin Elbasy volonterlar men áleýmettik qyzmetkerlerdiń jumys formatyn qaita qaraýdy usyndy», - deidi Aidos Úkibai.
Sonymen qatar áńgime barysynda ákimder Nursultan Nazarbaevqa aimaqtardyń qajet etetin ár turǵynyna áleýmettik kómekti jetkizý maqsatynda qurylǵan «Birgemiz» Qoǵamdyq qorymen jumystyń qalai júrgizilip jatqanyn baian etken. Máselen Aqmola oblysynda 3 myńǵa jýyq adam Qor esebinen 50 myń teńge alady.
«Soltústiktegi óńirlerdiń ákimderimen sóilesken kezde Qazaqstannyń Tuńǵysh Prezidenti sý tasqynyna qarsy is-sharalar men kóktemgi egis naýqanyna basa nazar aýdardy. Atap aitqanda Nursultan Nazarbaev agrarshylardyń daiyndyǵyna, aýyl sharýashylyǵy tehnikalarynyń jai-kúii jaily bilgisi keldi. Elbasy agrarshylarǵa senim bildirip, qiyndyqtarǵa qaramastan olarǵa jan-jaqty kómek kórsetiletinin jetkizdi», - deidi ol.
Aidos Úkibai odan bólek Qaýipsizdik Keńesi tóraǵasynyń ońtústiktegi oblystardyń basshylarymen sóilesken kezinde eldiń barlyq óńirine azyq-túlik jetkizýde osy aimaqtardyń róli zor ekenin aityp ótkenin jazady. Túrkistan oblysynyń ákimi Ómirzaq Shókeev erte pisetin kókónisterdi keibir aimaqqa jetkizý jumystary bastalyp ketkenin baiandaǵan. Sonymen qatar Elbasy Túrkistan qalasyndaǵy qurylys jumystarynan habar aldy. Oblys ákimi qurylys alańdarynyń bárinde sanitarlyq-epidemiologiialyq talaptar saqtalatynyna sendirip otyr.
«Almaty oblysynyń ákimi Amandyq Batalovpen telefon arqyly sóileskende Nursultan Nazarbaev almatylyq aport almany jańǵyrtý úrdisi men osy jyly qant qyzylshasyn jinaýdyń ishki ósimi týraly surady. Sondai-aq Batalov aimaqta taǵy da 23 myń jumys orynyn ashý men Taldyqorgan-Úsharal-Dostyq baǵyty boiynsha avtokólik jolynyń qurylysy týraly baiandady. Aimaq basshylarymen sóilesken kezde Nursultan Nazarbaev memleket óz azamattaryn jan-jaqty qorǵaitynyn jáne Qazaqstannyń barlyq qiyndyqty eńseretinine senim bildirdi», - deidi Aidos Úkibai.
