Mektep direktorlary oqý jyly bastalar aldynda pedagogikalyq keńester ótkizip jatyr. Ár bilim berý uiymynyń basshysy ujymyna mektepte oqý jyly qalai bastalatynyn, shtattyq rejimde oqityndar úshin qandai sanitarlyq qaýipsizdik sharalary qabyldanǵanyn, balalardy qashyqtan oqytý úshin mektep qandai platformany tańdaǵanyn, baǵalaý júiesine qandai ózgerister engizilgenin jáne oqý protsesin uiymdastyrýǵa qatysty ózge de saýaldar boiynsha túsindirý jumystaryn júrgizip jatyr.
Qalyptasqan epidemiologiialyq jaǵdailarǵa bailanysty 2020-2021 oqý jyly qashyqtan bilim berý formatynda bastalady. Ata-analardyń qalaýy boiynsha mektepterde 1-4 synyp oqýshylary úshin kezekshi synyptar jumys isteitin bolady. Bir synypta bilim alýshylar sany 15-ten aspaidy.
Pedkeńes barysynda pedagogterge oqytý erejeleri men kezekshi synyptarda sanitarlyq qaýipsizdikti qamtamasyz etý sharalary egjei-tegjeili túsindiriledi. Oqýshylar men pedagogterdiń temperatýrasy kúnde ólshenip, dene qyzýy normadan joǵary bolǵan jaǵdaida jáne aýrý belgileri anyqtalsa, pedagogter jumysqa kirispeidi, al oqýshylar úilerine qaitarady.
«Eger ata-analar nemese balalardyń zańdy ókilderi niet bildirip, ótinish jazsa, al mektep sanitarlyq normalardy qatań saqtaýǵa daiyn bolsa, bastaýysh synyp oqýshylary mektep qabyrǵasynda oqi alady. Mektepterde joǵary synyp oqýshylarynyń kabinetteri bos bolǵandyqtan, bul kabinetterdi de bastaýysh synyptardy oqytýdy uiymdastyrý úshin paidalanýǵa bolady. Ata-analardyń ótinishterin synyp jetekshileri qoljetimdi bailanys quraldary arqyly onlain-formatta qabyldaidy. Mektep formasyna qatysty: jalpy formaǵa qoiylatyn talaptar joiylmaidy, biraq ýaqytsha ózgerister engizildi, soǵan bailanysty biyl ata-analar balany mektep formasynda nemese basqa da yńǵaily kiimmen jiberý týraly sheshimdi ózi qabyldaidy», – dep atap ótti BǴM baspasóz qyzmeti.
Mektepterdegi kompiýterler balalarǵa ýaqytsha paidalanýǵa beriledi. Sonymen qatar bilim basqarmalary, bólimderi qosymsha kompiýterler, noýtbýkter, planshetter satyp alyp, qabyldaý-tapsyrý aktileri negizinde oqýshylarǵa tapsyrady.
Árbir óńir, bilim berý uiymy qashyqtan oqytýdy uiymdastyratyn internet-platformany ózi tańdaidy. Qashyqtan oqytý formaty aiasynda muǵalimder men oqýshylar platforma arqyly striming júiesin qoldanatyn bolady.
Sondai-aq pedagogikalyq keńeste muǵalimderge sabaqty uiymdastyrý boiynsha usynystar talqylanyp jatyr. Shalǵaidaǵy aýyldyq eldi mekenderde ornalasqan shaǵyn jinaqty mektepterde kúndizgi formatta oqytýdy uiymdastyrý máselesi de nazardan tys qalmaidy.
Kún tártibindegi taǵy bir mańyzdy taqyryp – karantindik jáne shekteý sharalary jaǵdaiynda 2-11(12) synyptardaǵy oqýshylardyń oqý jetistikterin baǵalaý. Pedagogikalyq keńesterde bilim alýshylardyń oqý jetistikterin baǵalaý júiesindegi ýaqytsha ózgerister talqylanyp jatyr.
