Foto Ashat Aimaǵambetovtyń Facebook paraqshasynan alyndy
Burynǵy oqý-aǵartý ministri Ashat Aimaǵambetov bilim salasynda atqarylǵan jumystardy baiandady, - dep habarlaidy "Ult aqparat".
"Qurmetti dostar, qymbatty áriptester! 2019 jylǵy maýsym aiynda Prezident Qasym-Jomart Toqaev maǵan óte mańyzdy bilim men ǵylym salalaryn senip tapsyrdy.
Keiinnen Memleket basshysy meni úsh ret qaita taǵaiyndady. Aldymen Bilim jáne ǵylym ministri, sodan keiin 100 jylǵa jýyq ýaqyttan keiin qaita qurylǵan, ulaǵatty aǵartýshy, ult ustazy Ahmet Baitursynov basqarǵan Oqý-aǵartý ministrligine qaita taǵaiyndady.
Osy ýaqyt ishinde maǵan júktelgen senimdi aqtaýǵa jáne ashyq bolýǵa, jumysta tiimdi ári paidaly bolýǵa tyrystym. Ómirimniń osy mańyzdy kezeńinde sizderdiń, Prezidenttiń, muǵalimderdiń, ata-analardyń, ministrliktiń búkil ujymynyń, azamattyq qoǵamnyń qoldaýynyń arqasynda mańyzdy nátijelerge qol jetkizdik.
Bilim jáne ǵylym salasyna jaýapty bolǵan ministr retinde ózderińizge esep berip, atqarylǵan jumystar týraly aitý jón dep sanaimyn. Aldaǵy ýaqytta ministr laýazymynda qabyldanǵan árbir sheshim týraly egjei-tegjeili esep berýdi jáne bul sheshimderdiń logikasy týraly aitýdy josparlap otyrmyn. Ony kez kelgen adam kóre alady" - dep jazdy eks-ministr Facebook paraqshasynda.
Ol "osy jyldar ishinde halyqtyń batasyn alyp, Prezidenttiń senimin aqtaý úshin jáne el igiligi úshin jumys isteýge tyrysqanyn" aitty.
"Jylpy alǵanda, men úshin ýaqyt talabyna sáikes keletin jańa reformalardy engizý ǵana emes, sonymen qatar sabaqtastyqty saqtaý mańyzdy boldy. Ásirese pandemiia kezinde qiyn boldy, biraq áriptesterimizdiń túsinigi men qoldaýynyń arqasynda ol ýaqyttan da óttik.
Osy ýaqyt aralyǵynda muǵalimderdiń úlken qoldaýyn sezindim. Sol úshin qurmetti áriptesterime alǵys aitqym keledi. Meniń sheshimderimdi túsinip, qoldaǵandaryńyz úshin raqmet. Onyń barlyǵy árqaisyńyzdyń eńbek jaǵdaiyńyzdy jaqsartýǵa baǵyttalǵan bolatyn.
Prezidenttiń qoldaýy arqasynda biz óte mańyzdy qujatty - «Pedagog mártebesi týraly» zańdy qabyldadyq. Sonyń arqasynda túbegeili ózgerister boldy. Mysaly: jalaqyny kóterý, qosymsha tólemder, mindetke jatpaityn qyzmetterden bosatý, bes kúndik jumys aptasyna aýysý, 30 jyl eńbek ótili bar muǵalimderdi UBT-dan bosatý jáne 25 jyldan astam jumys ótili bar muǵalimderge tósbelgi taǵaiyndaý jáne t.b.
Bilim berý salasy - qarqyndy damyp kele jatqan sala. Sondyqtan engizilgen jańalyqtarǵa túsinistikpen qaraǵan ata-analarǵa alǵysymdy bildirgim keledi. Qandai da bir bastamany júzege asyrǵanda balalarymyzdyń múddelerin negizge aldyq. Osyǵan deiin de balalarymnyń memlekettik mektep pen balabaqshaǵa baratynyn birneshe ret aitqan bolatynmyn" - dedi Aimaǵambetov.
Onyń sózinshe, ministrlik balabaqsha tárbieshilerine, kolledj muǵalimderi men ýniversitet oqytýshylaryna da qolaily jaǵdai jasaýǵa tyrysqan.
"Barlyq ideia men alǵa qoiylǵan mindetti iske asyrǵan Oqý-aǵartý ministrliginiń, vedomstvolyq baǵynysty uiymdardyń, departamentterdiń, bilim basqarmalarynyń, ádistemelik kabinetterdiń, bilim berý uiymdarynyń barlyq qyzmetkerine erekshe alǵysymdy bildirgim keledi. Sizder baǵalaýǵa kelmeitin aýqymdy jumys atqardyńyzdar. Keide tym qatal, talapshyl bolatynymdy bilemin.
Ashyq sóilep, qoldaý bildirip, syn aitqan qoǵam qairatkerleri men belsendilerge alǵys aitamyn. Men árqashan syndarly eskertýlerdi qabyldaýǵa daiynmyn jáne olardy túzetýge tyrysamyn. Sondai-aq jańalyqtarymyzdy jariialaǵan jýrnalisterge de eńbekteri úshin alǵys aitamyn. Biz ózekti aqparatty belsendi túrde bólisýge jáne dialog úshin árqashan ashyq bolýǵa tyrystyq. Kez kelgen adam tyńdai alatyn apparat jinalystary apta saiyn uiymdastyryldy. Jumys kestemniń tyǵyzdyǵyna qaramastan, suhbatqa da ýaqyt bólýge tyrystym. Óitkeni jańalyqtar men qabyldanǵan sheshimderdi otandastarymyzǵa ýaqytyly jetkizý jáne olardyń túsinýi mańyzdy boldy.
Tárbieshilermen, oqýshylarmen, stýdenttermen, ustazdarmen, mektep, kolledj direktorlarymen, oqytýshylarmen, rektorlarmen, ǵalymdarmen, bilim basqarmalary men vedomstvolyq baǵynysty uiymdardyń basshylarymen kóptegen kezdesý ótkizdim. Men úshin ártúrli deńgeidegi bilim berý ókilderiniń pikirlerin tyńdaý jáne qandai da bir sheshim qabyldaǵanda barlyq máseleniń «oń» jáne «teris» jaqtaryn tarazylaý mańyzdy boldy.
Osy qyzmette salanyń damýyna úles qosyp, otandastarym men Prezidenttiń senimin aqtai aldym dep úmittenemin. Barshańyzǵa qoldaý kórsetkenińiz úshin alǵys aitamyn, sondai-aq Oqý-aǵartý men Joǵary bilim jáne ǵylym ministrlikterindegi áriptesterime tabysty jumys tileimin. Men ádettegidei qoǵamǵa ashyqpyn. Birlesken jumys pen barlyq bastamama qoldaý kórsetkenderińiz úshin taǵy da alǵys aitamyn" - dep túiindedi eks-ministr.
