Qazan aiynyń sońynda EKSPO mamandandyrylǵan kórmesiniń barlyq pavilondary tapsyrylady. Qurylys jumystary 100 paiyzǵa aiaqtalǵan. Bul týraly búgin «Astana EKSPO-2017» Ulttyq kompaniiasy» AQ Halyqaralyq qatysýshylarmen jumys departamentiniń basshysy Ilia Orazaqov aitty, dep habarlaidy Baq.kz tilshisi.
«Kelesi jyly Astanada ótetin EKSPO kórmesine 110 memleket qatysatyna eshqandai kúmánimiz joq. Áli de qatysýshylarǵa ótinish berýge ýaqyt bar. Tirkeý jumystary jalǵasyp jatyr. Búgingi tańda resmi túrde 104 qatysýshy óz ótinishterin berdi. Osy rette, men bir qyzyqty derekti aita keteiin. Eger Qazaqstandaǵy EKSPO kórmesine 110 memleket qatysatyn bolsa, úzdik úshtiktiń qataryna enemiz. Sebebi, buǵan deiingi kórmelerde 110-nan kóp qatysýshysy bolǵan eki ǵana kórme bar. Birinshisi – Portýgaliia. Pirenei túbeginde ótken kórme jumysyna 140 memleket qatysqan. Al ekinshi oryndaǵy Qytaidaǵy kórmege 121 memleket kelgen. Sondyqtan Qazaqstannyń bul jaǵynan «qola júlde» alýǵa múmkindigi bar», – Ilia Orazaqov.
Onyń aitýynsha, ulttyq kompaniia qazirgi kezde árbir qatysýshyǵa qoldaý bildirý maqsatynda kóptegen jumystar istep jatyr eken.
«Bul kózge kórinbeitin jumys. Departament kún saiyn qatysýshylarǵa qoldaý kórsetedi. Árqaisyna jeke-jeke kóńil bólý kerek. Árbir memlekettiń óz jospary, tapsyrmasy bar. Osy kórme aiasynda belgili bir jetistikti baǵyndyrýdy kózdeidi. Sondyqtan «Astana EKSPO» kompaniiasy diplomatiialyq qarym-qatynastan bólek, árbir qatysýshymen jeke de jumys istep jatyr. Biz qatysýshylarmen áriptestik, dostyq jáne kásibi bailanys ornatýdy kózdeimiz», – dep atap ótti ulttyq kompaniia ókili.
Departament basshysynyń málimeti boiynsha, kórmege qatysýshylardyń úsh ai boiy atqaratyn jumystarynyń kúntizbesi jasalyp jatyr.
Aita keteiik, EKSPO mamandandyrylǵan kórmesiniń qurylys jumystary tolyqtai derlik aiaqtalǵan. Qazan aiynyń sońynda barlyq pavilondar tolyǵymen tapsyrylady.
