Qyrǵyzstannyń burynǵy prezidenti Qurmanbek Bakiev "Jany Ordo" gazetine bergen suhbatynda kez-kelgen sotqa qashyqtan qatysýǵa daiyn ekenin jetkizdi, dep habarlaidy Ulysmedia.kz.
Bakiev Londondaǵy Halyqaralyq sotta uly Maksim Bakievtiń isine qatysty protseske onlain qatysqanyn aitty.
"Men kez-kelgen halyqaralyq sotqa qatysýǵa daiynmyn. Meniń aty-jónim tarihta jáne halyq aldynda taza bolýy úshin bárine daiynmyn. Maǵan shyndyq pen aqiqat kerek. Qyrǵyzstan biligi meniń qaida turyp jatqanymdy biledi. Men Minskidegi rezidentsiiada turamyn. Eshkim maǵan qandai da bir is boiynsha aiyp taqpady. Qazir barlyq eldiń prezidentteri otyrystaryn onlain ótkizip jatyr. Eger meni sotqa onlain shaqyrǵysy kelse, muny isteitin edi. Men keliser edim", - deidi eks-prezident.
Eske sala keteiik, Qurmanbek Bakiev 2010 jylǵy sáýir revoliýtsiiasynda Qyrǵyzstan biliginen qýyldy. Narazylyq aktsiiasy kezinde 90 adam qaza tapty.
Belarýsten saiasi baspana alǵan Bakiev Qyrǵyzstanda syrttai sottalyp, 30 jylǵa bas bostandyǵynan aiyrylǵan. Al onyń inisi Kúzet qyzmetiniń basshysy Janysh Bakiev ómir boiy túrme jazasyna kesilgen. Uly Marat 30 jylǵa sottalǵan. Kishi uly Maksim Bakiev te birneshe qylmystyq áreketter boiynsha aiypty dep tanylyp, ómir boiy túrme jazasyna kesilgen.
