Eks-ministr Aleksei Tsoi buryn Densaýlyq saqtaý ministrligin basqarǵan Eljan Birtanov pen burynǵy vitse-ministr Oljas Ábishevke qatysty sot protsesinde kýáger retinde jaýap berdi, - dep habarlaidy Tengrinews.kz tilshisi.
Tsoi 2017 jyly vitse-ministr retinde ministrlikti aqparattandyrýǵa jaýapty bolǵanyn aitty. Sol jyldary ol densaýlyq saqtaý júielerin aqparattandyrý jáne ózara árekettesý platformasyn ázirleýdi qadaǵalaǵan, ol durys jasalmaǵany úshin Birtanov qyzmettik ókilettigin asyra paidalandy dep aiyptalǵan.
"Bul úkimettiń resmi qoldaýyna ie bolǵan Dúniejúzilik bank jobasy bolatyn. Joba ózara árekettesý platformasyn qamtydy. Aldyn ala tólem kerek edi, naqty tsifrdy aita almaimyn. Soma kompaniianyń kepildik mindettemelerimen kezeńderge bólindi, sharttar men qamtamasyz etý de anyqtaldy. Aldaǵy ýaqytta kompaniia qyzmetkerlerin oqytyp, platformany paidalanýǵa berýi kerek dep esepteldi. (...)
Kelisimshart boiynsha ol merziminen buryn oryndalýy kerek edi, biraq túrli fors-majorlyq jaǵdailarǵa bailanysty kelisimshart merzimi uzardy. Tehnikalyq spetsifikatsiiada qarastyrylǵan keibir jabdyq alyp tastaldy jáne jańa sipattamalardy bekitý kerek boldy. Artynsha Ericsson Nikola Tesla kompaniiasy merzimdi birneshe ret shegerdi. Biraq jobany oryndaý merzimi - 2017 jyl jetkende kompaniia bárin júzege asyrýǵa úlgermei, aqsha biýdjetke qaitaryldy", - dedi Aleksei Tsoi sotta.
Onyń aitýynsha, kompaniia únemi kelisimshart merzimin uzartýdy suraǵan.
"Biz olardy qoldadyq. Bizge jobanyń aiaqtalýy mańyzdy boldy, bul Qazaqstanǵa óte mańyzdy. Bizdiń elimiz bul jobany álemde alǵashqylardyń biri bolyp júzege asyrýy tiis edi. Biraq jobanyń merzimi aiaqtalýǵa jaqyn edi, biz kompaniiaǵa habar berdik, olar keldi, synaq jumystaryn júrgizdi, biraq júie tolyq jumys istemedi", - dedi ol.
Tsoi ministr Birtanovqa birneshe ret Ericsson Nikola Tesla belgilengen merzimnen keshigip, platformany ázirleýdi aiaqtamai jatqanyn habarlaǵanyn aitty.
"Ministr deńgeiinde kezdesýler ótti, oǵan jazbasha esep berdik, aýyzsha aittyq. Ol barlyq jaǵdaidan habardar boldy. Ol mamandardyń pikirine súiendi. Ol:" Iske asyryńdar, jumys isteńder, tezdetińder" dedi, - dep aitty Tsoi.
Nátijesinde ENT tóleýge tiis soma igerilmegen bóligi retinde biýdjetke qaitaryldy.
"Májiliste de, Senatta da úlken soma nege igerilmei jatyr degen suraq qoiyldy. Biz júie aiaqtalmaǵanyn alǵa tarttyq. Bul aqshany bitpegen jumysqa tólegenshe, Qazaqstanda qaldyryp, biýdjetke qaitarǵan durys. Árine, qoldanbaǵany úshin syn aityldy, biraq bir kezderi olar bizdi túsindi", - dedi Tsoi.
Tsoi sonymen qatar kompaniiamen kelispeýshilikter 2017 jyldan 2021 jylǵa deiin jalǵasqanyn aitty. Bir kezde ENT jergilikti qyzmetkerlerdi aiyptap, qazaqstandyq júie olardyń platformasyna daiyn emes ekenin aitqan.
Birtanov Tsoidan "2017 jyly men platformany ázirleý jáne jetkizý boiynsha mindettemelerdiń búkil kólemi úshin Ericsson Nikola Tesla sertifikattaryn qabyldaýdy jáne qol qoiýdy tapsyrdym ba?" dep surady.
"Joq, tapsyrmadyńyz", - dedi Tsoi.
