Foto: primeminister.kz
Ulttyq ekonomika ministri Álibek Qýantyrov Úkimet otyrysynan keiin Reseimen shekaralas aýyldardyń problemasy týraly pikir bildirdi, dep habarlaidy QazAqparat.
«Biz ol aýyldardyń bolashaǵy joq dep eshqashan aitqan emespiz. Tirek aýyldar men oǵan serik aýyldar iriktelgen bolatyn. Damý áleýeti áldeqaida joǵary aýyldar bar, onda halyqtyń 90%-dan astamy turady. Halqynyń sany az, damý áleýeti tómen aýyldarǵa da kóńil bólinip otyr. Biraq «Aýyl – el besigi» baǵdarlamasynyń aiasynda emes, basqa baǵdarlamalardyń aiasynda. Qarajat birinshi kezekte jergilikti biýdjetterden bólinedi. Óitkeni bul jergilikti atqarýshy organdardyń da jaýapkershiligi. Shekaradaǵy aýyldarǵa Úkimet tarapynan da, jergilikti ákimdikter tarapynan airyqsha kóńil bólinedi», - dedi ministr.
Ministr shekara zastavalaryna jaqyn ornalasqan aýyldar memleket qoldaýynsyz qalmaitynyn basa aitty.
«Reseimen shekarada jatqan aýyldarǵa qatysty aitsaq, adam tym az turatyn aýyldar bar. Bálkim bul tabiǵi protsess shyǵar – adamdar aýyldan kóship jatyr. Biraq irgesinde shekara beketteri turǵan aýyldar bar. Olar únemi qoldaý kóretin bolady. Óitkeni shekara beketterin qaitkende de qoldaý qajet. Buryn da aitqanmyn, shekara beketteri turǵan jerdiń mańaiynda infraqurylym jetildiriledi», - dedi Álibek Qýantyrov.
