Qorshaǵan ortaǵa emissiialar normativterin buzǵany úshin ákimshilik aiyppul 10 ese artady. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy "Ult aqparat".
«Taldaý kórsetkendei, tabiǵat paidalanýshylardyń negizgi zań buzýshylyqtary júieli negizde jasalady. Kóbinese olarǵa tazartý jabdyqtaryn engizýden jáne qorshaǵan ortaǵa áserdi azaitýdan góri, aiyppul tóleý tiimdirek. Ilespe zań jobasynyń aiasynda qorshaǵan ortaǵa emissiialar normativterin buzǵany úshin ákimshilik aiyppul 10 ese artady. Qaita buzylǵan jaǵdaida – 20 ese kóbeiedi», - dedi ministr Májiliste jańa Ekologiialyq kodeks jobasyn tanystyra otyryp.
Onyń sózine qaraǵanda, óndiris jáne tutyný qaldyqtarymen jumys isteýge qoiylatyn talaptardy buzǵany úshin sanktsiialardy qatańdatý kózdelýde.
«Qorshaǵan ortany qorǵaý salasyndaǵy erjeni buzǵany úshin ákimshilik jaýapkershilikke tartý merzimi talaptardy buzýshylyq jasalǵan kúnnen bastap 1 jyldan 3 jylǵa deiin artady. Barlyǵyn qamtý jáne zerthanalyq zertteýlerdiń nátijelerin alý maqsatynda tekserý merzimi qajet bolǵan jaǵdaida qosymsha 10 kúnge artýy múmkin», - dedi Myrzaǵaliev.
