II toqsanda kontingenti 300 oqýshyǵa deiingi qalalyq jáne aýyldyq mektepter dástúrli oqytý formatyna kóshiriledi. Bul týraly QR Premer-Ministriniń orynbasary Eraly Toǵjanovtyń Senat depýtattary saýalyna bergen jaýabynda aitylǵan, dep habarlaidy "Ult aqparat".
Aita keterligi, Senat depýtattary kontingenti 181-den 600 adamǵa deiingi, bir synyptaǵy balalardyń sany 15 oqýshydan aspaityn aýyldyq jerlerde ornalasqan mektepterdiń jumysyn kezeń-kezeńimen qaita bastaýǵa qatysty depýtattyq saýal joldaǵan edi.
«Úkimet mektep oqýshylaryn qashyqtan oqytýǵa kóshirý týraly sheshimdi faktorlar keshenin, onyń ishinde mektep oqýshylary arasynda COVID-19-dyń taralýynyń epidemiologiialyq táýekelderin, bastaýysh synyp oqýshylarynyń qashyqtyqtan oqytýǵa beiimdiligin, mektepterdiń shamadan tys tyǵyzdalýyn qosa alǵanda, materialdyq-tehnikalyq jaraqtandyrylýyn eskere otyryp qabyldady. Mektepterde balalar arasynda syrqattanýshylyqtyń aldyn alýyna baǵyttalǵan negizgi sharalar synypta jáne mektepte kóp jinalýǵa jol bermeý, oqý jáne úzilister kezinde qashyqtyqty saqtaý múmkindigi, mektepte maska rejimin jáne epidemiiaǵa qarsy qatań sharalardy saqtaý bolyp sanalady. Bul rette, oqýshylardyń, ásirese orta jáne joǵary synyp oqýshylarynyń mektepte kórsetilgen talaptardy saqtaýyn qamtamasyz etý aitarlyqtai kúrdeli. Budan basqa, karantin rejiminiń belgilengen talaptary saqtalmaǵan kezde jabyq úi-jailarda balalardyń kóp shoǵyrlanýy aýrýdyń taralý qaýpin týdyrady», - deidi Úkimet basshysynyń orynbasary depýttarǵa qaitarǵan jaýabynda.
Sonymen qatar ol bastaýysh synyp oqýshylary ata-analarynyń ótinishteri boiynsha sanitariialyq-epidemiologiialyq talaptardy qatań saqtai otyryp, kezekshi synypta bilim alyp jatqanyna nazar aýdartady. Bul rette synypty 15 baladan kishi toptarǵa bólý, aýysymdar men kishi aýysymdardyń sanyn ulǵaitý, kabinettik júieni alyp tastaý, ár túrli ýaqyttaǵy úzilister, birjaqty qozǵalys júiesi, kireberiste kúndelikti temperatýrany ólsheý, synyptaǵy balalardyń jai-kúiin baqylaý, jeldetý, kvartstaý, úi-jailardy ylǵaldy jinaý, meditsinalyq kabinetter men izoliatorlardyń úzdiksiz jumys isteýi, mektepte qatań maska rejimi qamtamasyz etilgen.
«Budan basqa, jiti respiratorlyq infektsiialardyń kútiletin aǵymdyq jaǵdaiynda uiymdastyrylǵan jabyq ujymdardy qalyptastyrý koronavirýstyq infektsiianyń berilý táýekelin edáýir arttyratynyn atap aitý kerek, bul infektsiianyń bilim alýshylar, pedagogtar men ata-analar arasynda tez taralýyna ákelýi múmkin. Osyǵan bailanysty Densaýlyq saqtaý ministrligi barlyq mektepterdi shtattyq oqytý formatyna kóshirýdi erte dep sanaidy. Búgingi kúni birqatar shet elderde (Germaniiada, Reseide, Angliiada, Polshada, Frantsiiada, AQSh-ta, Ońtústik Koreiada, Úndistanda) kúndizgi oqý kezinde koronavirýstyń tez taralýyna bailanysty mektepter karantinge jabylýda», - deidi ol.
Úkimet basshysy orynbasarynyń dereginshe, osy jylǵy 25 qazanda elimizde oqýshylar arasynda COVID-19 aýrýynyń 298 jaǵdaiy tirkeldi. Onyń 127-si oflain rejimde jáne 171-i qashyqtan oqyǵan.
«QR aýmaǵynda koronavirýstyq infektsiianyń paida bolýy men taralýyna jol bermeý jónindegi vedomstvoaralyq komissiia 2020 jylǵy 26 qazanda 2020-2021 oqý jylynyń ekinshi toqsanynan bastap kontingenti 300 oqýshyǵa deiingi qalalyq jáne aýyldyq mektepterdi dástúrli oqytý formatyna kóshirý, ata-analardyń ótinishi boiynsha jalpy bilim beretin mektepterde 1-den 5-synypqa deiin, halyqaralyq mektepterde 7 synypqa deiin kezekshi synyptarda oqytýǵa ruqsat etý týraly sheshim qabyldady. Bilim berý protsesiniń sapasyn qamtamasyz etý, qashyqtyqtan oqytý kezeńinde balalardyń bilimindegi yqtimal olqylyqtardyń ornyn toltyrý maqsatynda Bilim jáne ǵylym ministrligi jergilikti atqarýshy organdarmen birlesip negizgi pánder boiynsha bilim qimalaryn diagnostikalaý, balalardyń oqý jetistikterin ata-analarǵa túsindirý, artta qalǵan oqýshylar úshin jeke konsýltatsiialar, kanikýldyq mektepter jáne ata-analar men balalardyń qalaýy boiynsha konsýltatsiialyq onkúndikter ótkizý boiynsha jumys júrgizýde», - deidi Eraly Toǵjanov.
Premer-Ministr orynbasary elimizdiń Densaýlyq saqtaý ministrligi halyq arasynda, onyń ishinde mektep oqýshylary men bilim berý uiymdarynyń personaly arasyndaǵy syrqattanýshylyqqa kúndelikti taldaý júrgizetindigin, mektepterdiń karantin rejiminde jumys isteýge daiyndyǵyn baǵalaityndyǵyn atap ótedi.
«Osynyń bárin eskere otyryp, DSM múddeli memlekettik organdarmen birlesip, qaýlyǵa kontingenti 300 oqýshyǵa deiingi qalalyq jáne aýyldyq mektepterdi dástúrli oqytý formatyna kóshirý, 1-5 synyptardyń kezekshi synyptarynda (ata-analardyń ótinishi boiynsha), halyqaralyq mektepterde 7 synypqa deiin (2020-2021 oqý jylynyń ekinshi toqsanynan bastap) oqytýǵa ruqsat etý bóliginde ózgeris engizedi», - deidi Úkimet basshysynyń orynbasary.
