Pavlodar oblysynda 5-6 qańtardaǵy jappai ereýilge qatysty delingen muǵalimder qýdalanyp jatqan joq. Bul jaiynda oblystyq bilim basqarmasynyń bastyǵy Dinislam Bolathanuly málim etti, dep habarlaidy QazAqparat.
Aita keteiik, buǵan deiin jelide Ekibastuz qalasynda mitingige qatysqa muǵalimder sebepsiz jumystan qýyldy degen aqparat taraǵan bolatyn.
«Ekibastuzǵa baryp, mektep direktorlarymen, bólim basshylyǵymen kezdesip qaittym. Eń basty maqsat - «alańǵa shyqqany úshin jumystan qýyldy» degen eki jas muǵalimmen kezdesý boldy. 10 mekteptiń muǵalimi Qanat Seiitovpen kózbe kóz kezdestim. Mektep basshylyǵy tarapynan eshqandai qýdalaý kórmegen. Jumystan shyǵarylmaǵan. Bilim bólimi men mektep basshylyǵy tarapynan qysym jasalynbaǵan. Aryz jazý talaby oǵan qoiylmaǵan! Ekinshi, 24 mekteptiń muǵalimi Oljas Janabilov boiynsha. Iá, mektep direktorynyń buiryǵyna sáikes jumystan bosatylǵan. Bul jerde tek eńbek qarym-qatynasy. Alańǵa shyǵýdyń esh qatysy joq. Bul máselede de, muǵalimniń azamattyq pozitsiiasy, ishki oiy nemese bólek pikirde bolǵany ne bolmaǵany siiaqty eshbir sebep joq», - dep jazdy bilim basqarmasynyń bastyǵy Facebook paraqshasynda.
Biraq, jas mamannyń saǵyn syndyrmai, eńbek etip, jalaqy alyp, otbasyna ie bolyp, ári qarai joǵary bilikti muǵalim retinde qalyptasýyna, ósýine jaǵdai jasaiyq, qarailasaiyq degen oimen áripester raiynan qaitty. Oljas muǵalim retinde qaita jumysyna kirisedi.
«Qadirli qaýym! Bul eki áriptestiń oqiǵasynan eshbir saiasi astar ne adamdy qýdalaý sipatyn izdeýdiń qajeti joq. Óitkeni oǵan negiz joq. Barlyqtaryńyzǵa rahmet. Amandyq bolsyn» dep túiindedi sózin Dinislam Bolathanuly.
