Elordada "Úzdik ustaz - 2019" respýblikalyq baiqaýynyń jeńimpazdary marapattaldy, dep habarlaidy Sputnik Qazaqstan.
Biylǵy konkýrsqa respýblika boiynsha 4 myńǵa jýyq pedagog qatysty. Olardyń ishinen 633 ustaz oblystyq týrǵa ótti. Al finalǵa 178 pedagog joldama aldy. Barlyǵy 64 adam úzdik ustaz atandy. Jeńimpazdarǵa arnaiy tósbelgi men marapattaý qaǵazy tabystaldy. Budan bólek, árbireýine 1000 ailyq eseptik kórsetkish (2 million 525 myń teńge) kóleminde beriledi.
Jeńimpazdardyń ishinde Kókshetaý qalasynan kelgen aǵylshyn pániniń muǵalimi Samal Ahmetjanova da bar. Ol barlyq týrlardan súrinbei ótip, biylǵy jyldyń úzdik pedagogy atanyp otyr.
"Oblystyq týrda 24 pedagog boldyq. Ol jerde irikteý tórt kezeńnen turdy. Birinshi kezeńde ózimizdi tanystyrdyq. Ekinshi kezeńde sabaq berýimizdi kórsettik. Odan keiin esse jazdyq. Al tórtinshi kezeńde portfoliomyzdy jiberdik. Sóitip, qazylar óz baǵasyn berip, jeńimpazdy anyqtady", - dedi Ahmetjanova tilshilerge bergen suqbatynda.
Al respýblikalyq deńgeide qatysýshylar taǵy esse jazyp, porfolio tapsyrǵan. Oǵan qosa, "Meniń júregimniń mektebi" taqyrybynda beinebaian túsirdi.
"Respýblikalyq irikteýden de ótip, jeńimpazdardyń qatarynan kórindim. Menińshe, bul - jyldar boiy jinaǵan eńbegim. Sosyn oqýshylardyń jetistikteri jaqsy bolsa, jeńiske jetýge bolady. Eńbek ótilim – 18 jyl. Osy konkýrsta jeńgen ustazdarǵa 1000 ailyq eseptik kórsetkish kóleminde syiaqy beremiz dep jatyr. Ázirshe, aqshany qalai jumsaitynymdy bilmeimin. Áli josparlanǵan joqpyn. Biraq orny tabylady ǵoi. Aqshany alǵasyn kóremiz", - dedi Ahmetjanova.
