Kólik politseileri Jambyl oblysynyń eki turǵynynan 28 keliden asa esirtki zattaryn tárkiledi, dep habarlaidy "Ult aqparat".
«Lýgovoi stantsiiasyndaǵy politsiia qyzmetkerleri aǵymdaǵy jyldyń 11 tamyzynda «Qarasora-2020» jedel-profilaktikalyq is-sharasyn júrgizý barysynda T.Rysqulov aýdanynyń qumdy aimaǵynda Jambyl oblysynyń eki turǵynyn anyqtap, ustady. Tekserý kezinde olardyń árqaisynan ózine tán iisi bar ósimdik tektes zat salynǵan bir-bir qap tabylyp, tárkilendi», - dedi Kóliktegi politsiia departamentiniń bastyǵy Ońal Bekeev.
Onyń aitýynsha, quqyqbuzýshylardyń turǵylyqty jerindegi shóp qorany tintý kezinde taǵy da 1,5 qap esirtki zaty tabylǵan. Saraptama qorytyndysyna sáikes, tárkilengen zattar jalpy salmaǵy 28 keliden asatyn marihýana esirtki zaty bolyp shyqqan.
«Sondai-aq kólik politseileri atalǵan tulǵalar bul esirtkini qumdy aimaqtan jinap, olardy temirjol kóligi arqyly respýblikanyń astanasy men soltústik óńirlerine tasymaldaýdy kózdegenderin anyqtady», - dedi O.Bekeev.
T.Rysqulov aýdandyq sotynyń úkimimen qaskúnemder osy qylmysty jasaǵany úshin kináli dep tanylyp, 3 jyl merzimge bas bostandyǵynan aiyrylǵan.
