«Aýyl sharýashylyǵyn qarjylai qoldaý qory» AQ filialdarynda azamattardyń nesie alýǵa bergen ótinimderin onlain-qabyldaý júiesi testtik rejimde iske qosyldy. Bul kásipkerlerdiń kompaniia keńsesine barmai-aq ótiniminiń maquldanǵanyn nemese maquldanbaǵanyn aldyn-ala bilýlerine múmkindik beredi. Bul týraly "Ult aqparat" Qordyń baspasóz qyzmetine silteme jasap habarlaidy.
Aita keteiik, Ekonomikany jańǵyrtý jónindegi memlekettik komissiianyń sheshimimen byltyr «QazAgro» holdingin transformatsiialaý baǵdarlamasy bekitilgen bolatyn. Ondaǵy negizgi baǵyttardyń biri – enshiles kompaniialardaǵy nesie berý protsesin avtomattandyrý. Osyǵan orai, Aýyl sharýashylyǵyn qarjylai qoldaý qory «Eńbek» nátijeli jumyspen qamtýdy jáne jappai kásipkerlikti damytý baǵdarlamasy aiasynda nesie ótinimderin qabyldaýdy avtomattandyrý jáne nesie ónimderin ońtailandyrý jumystaryn júrgizýde.
«Ótinimderdi qaraý protsesiniń merzimin qysqartý, sapasyn jáne ashyqtyǵyn arttyrý maqsatynda «Mal sharýashylyǵyn damytýǵa nesie berý» ónimi boiynsha (4 mln teńgege deiin) testtik rejimdegi ótinimderdi onlain qabyldaý júiesi engizildi. Kásipker úiinde nemese keńsede otyryp, júiege óziniń elektrondy tsifrlyq qoltańbasynyń (HQKO-nan nemese egov.kz arqyly alǵan) kómegimen kiredi de «Eńbek» baǵdarlamasynyń talaptaryna sáikestigin tekserýge ótinim jibere alady. Qordyń avtomattandyrylǵan júiesi memlekettik derekqorlar men kredittik biýrolardyń málimetterin paidalana otyryp, áleýetti nesie alýshynyń senimdiligi men nesie alý múmkindigin tekseredi. Ótinim aldyn ala maquldanǵannan keiin kepildikke qoiatyn múliginiń qujattaryn alyp, Qorǵa barady. Eger qandai da bir sebeptermen maquldamaý týraly sheshim shyǵarylsa (salyqqa qatysty, bankter men basqa qarjy institýttary aldyndaǵy merzimi ótken bereshek, jaǵymsyz nesie tarihy jáne t.b.), qujat jinap, Qorǵa barýdyń qajetti joq», - delingen baspasóz baianynda .
Ótinimderdi onlain qabyldaý júiesi Aqmola jáne Almaty oblystarynyń turǵyndary úshin Nur-Sultan jáne Almaty qalalarynda ornalasqan filialdarda iske qosyl ǵan.
«Biznes-protsesterdi ońtailandyrý Qor qyzmetindegi mańyzdy baǵyttardyń biri. Júieni avtomattandyrýǵa qatysty aýqymdy jumystar júrgizildi. Ótinimdi avtomatty túrde berý júiesi ázirlendi. Onyń kómegimen memlekettik derekter qorynyń, memlekettik kredittik biýronyń jáne Birinshi kredittik biýronyń qoljetimdi málimetterine taldaý júrgiziledi», - deidi «Aýyl sharýashylyǵyn qarjylai qoldaý qory» AQ Basqarýshy direktory Marina Asanova.
Nesieni aldyn-ala onlain maquldaýǵa ótinish berý úshin ne isteý kerek? Eger siz Aqmola nemese Almaty oblysynyń turǵyny bolsańyz jáne mal sharýashylyǵyn damytýǵa qarjy alǵyńyz kelse, www.online.fagri.kz portalyna kirińiz jáne kelisimge qol qoiyńyz. «Jańa ótinim jasaý» batyrmasyn basyp, ótinimdi jeke kabinet arqyly jiberińiz. Júie memlekettik derekqordan aqparat suratý arqyly azamattyń nesie alý múmkindigi men senimdiligin tekseredi. Oń nátije bolǵan jaǵdaida "jalǵastyrý" batyrmasy iske qosylady.
«Kepildikti qamtamasyz etý» bóliminde kepilge qoiýdy josparlaǵan múlikke qatysty derekterdi engizińiz, júie múliktiń naryqtyq qunyn esepteidi. Usynylǵan kepildik múlki jetkilikti bolǵan jaǵdaida júie kepildikti qamtamasyz etý jónindegi qujattarmen oblystyq filialǵa júginý múmkindigi týraly habarlamany kórsetedi. Qujattardy nesie menedjerine tapsyrǵannan keiin siz ózińizdiń jeke kabinetińizden ótinimińiz boiynsha júrgizilip jatqan jumystyń qai deńgeide ekenin baqylai alasyz. Ýákiletti organ oń sheshim shyǵarǵan jaǵdaida nesie shartyn jasasý úshin Aýyl sharýashylyǵyn qarjylai qoldaý qorynyń oblystyq filialyna barýyńyz kerek.
Ótinimdi qaraýdyń elektrondyq formaty «adami faktor» men suratylatyn qujattardyń sanyn azaitady. Sondai-aq, basqa da qujattardy daiyndaý men qaraý kezeńderi alynyp tastaldy. Janýarlardyń túrlerine, olardyń sany men aimaǵyna bailanysty biznes-josparlardy standarttaý jumysy júrgizildi. Klientke biznes-jospar jasaýdyń qajeti joq, oǵan júieden jeke biznes-jospar beriledi. Sonymen qatar, buryn 10-13 qujat jinaý talap etilgen bolsa, qazir tek ótinim berýshiniń jeke kýáligi, elektrondy tsifrlyq qoltańbasy jáne kepildikke qoiatyn múliginiń qujaty ǵana qajet. Ótinimdi aldyn ala maquldaý sheshimi 1 saǵatqa deiingi aralyqta qabyldanady. Al, ótinimdi odan ári qaraý merzimi 15-ten 3 jumys kúnine deiin qasqarady. Nesiege qatysty qosymsha aqparatty www.fagri.kz saitynan oqýǵa bolady.
