Eki aptanyń ishinde Qazaqstan boiynsha COVID-19 infektsiiasyn juqtyrý deńgeii 1,9 ese ósken, dep habarlaidy "Ult aqparat".
Ortalyq kommýnikatsiialar qyzmetinde ótken brifingide Densaýlyq saqtaý ministri Aleksei Tsoi osyndai málimet aitty.
«Sońǵy eki aptada aldyńǵy eki aptaǵa qaraǵanda respýblika boiynsha barlyq óńirde aýrý juqtyrý kórsetkishi óskeni baiqalyp otyr. Aýrý juqtyrý ósimi 1,9 ese artqan – 41 296-dan 80 286 jaǵdaiǵa deiin kóbeidi. Táýlik saiyn aýyrǵandardyń ortasha kórsetkishi maýsym aiyna qaraǵanda 5,2 ese ósti. 1 shildedegi jaǵdaimen salystyrsaq, infektsiialyq jáne reanimatsiialyq tósek júktemesi 3 ese ósken», - dedi vedomstvo basshysy.
Ministr, sondai-aq, eldiń barlyq óńirinde infektsiialyq tósek-oryn júktemesi artyp ketkenin atady.
«El boiynsha tósek-oryn qory 1,4 ese kóbeitildi. 28 shildedegi jaǵdai boiynsha infektsiialyq tósek júktemesi respýblika boiynsha - 53 paiyzǵa, reanimatsiialyq tósek júktemesi - 42 paiyzǵa jetti. Ásirese Almaty, Shymkent qalalarynda, Aqtóbe, Túrkistan, Qyzylorda oblystarynda infektsiialyq jáne reanimatsiialyq tósekterdiń júktemesi joǵary bolyp tur. Qazir densaýlyq saqtaý júiesi byltyrǵy jaǵdaimen salystyrǵanda eki eselengen júktememen jumys istep jatyr. Byltyr osy kezde táýligine 2000 adam aýyrǵan bolsa, biyl shildede 6 925 adamǵa jetip otyr», - dedi Aleksei Tsoi.
