Densaýlyq saqtaý ministri Aleksei Tsoi elimizdegi koronavirýs infektsiiasynyń taralýy jaǵdaiyna qatysty pikir bildirdi, dep habarlaidy "Ult aqparat".
«Qazaqstan Respýblikasynda 30 naýryzdaǵy jaǵdai boiynsha 243 318 naýqastan Covid-19 anyqtaldy jáne 50 433 adamǵa KVI- (minýs) diagnozy qoiyldy. 218 031 adam KVI+ jáne 47 837 azamat KVI- (minýstan) jazylyp shyqty. Sońǵy 2 aptada Almaty, Nur-Sultan, Shymkent qalalarynda, Aqtóbe, Almaty oblystarynda naýqas sany artyp, jalpy KVI juqtyrǵandar 1,5 ese ósti», - dedi ministr Ortalyq kommýnikatsiialar qyzmetinde.
Onyń aitýynsha, jalpy indet juqtyrýdyń 56 paiyzy Almaty qalasy turǵyndaryna tiesili. Qalada aqpanda táýligine 100 jaǵdai, naýryzda táýligine 500 jaǵdai tirkeldi. Nur-Sultan qalasynda aqpanda táýligine 100 jaǵdai, naýryzda táýligine 350 jaǵdaiǵa jetti.
«4 óńir qaýipti aimaqta (qyzyl aimaqta) tur: Almaty, Nur-Sultan qalalary, Batys Qazaqstan jáne Atyraý oblystary. 3 óńir (Aqtóbe, Almaty jáne Qaraǵandy oblystary) sary aimaqta. Qalǵan 10 óńir jasyl aimaqta. Epidemiologiialyq jaǵdai nasharlaǵan «sary» jáne «qyzyl aimaqqa» aýysqan óńirlerde qosymsha shekteý sharalary engizildi», - dedi Tsoi.
Sondai-aq, ol KVI boiynsha jaǵdaiy aýyr naýqastardyń sany artqanyn aitty.
«28 aqpanmen salystyrǵanda, 30 naýryzdaǵy kórsetkish boiynsha jaǵdaiy aýyr naýqastardyń sany 32 paiyzǵa artyp, 440 adamdy qurady», - dedi ministr Ortalyq kommýnikatsiialar qyzmetinde.
Onyń aitýynsha, naýryz aiynan bastap halyqty testileýden ótkizý kólemi táýligine 49 myń zertteýgedeiin artty. Aqpan aiynda táýligine 38 myńǵa deiin zertteý júrgizildi. Testileýden ótkizýdiń táýliktik qýaty 113 myń zertteýdi quraidy.
