Foto: Egov.kz
eGov Mobile mobildi qosymshasy sońǵy jyldardaǵy eń aýqymdy jańartýdan ótti: interfeisi qaita jasaldy, navigatsiiasy jetildirildi, intellektýaldy izdeý men tsifrlyq qujattarǵa jedel qol jetkizý múmkindigi qosyldy, dep habarlaidy Ult.kz.
Jańartý ósip kele jatqan suranysqa jaýap retinde iske asyryldy – bes jyl ishinde eGov Mobile qoldanýshylarynyń sany alty esege ósip, 11 millionnan asty.
Intellektýaldy izdeý jáne virtýaldy kómekshi
Basty jańalyqtardyń biri – intellektýaldy izdeý. Endi suranysty engizgen sátte barlyq sáikes nátijeler kórsetiledi: qyzmetter men ómirlik jaǵdailar. Izdeý jolaǵynyń janynda jasandy intellekt negizinde jumys isteitin eGov AI virtýaldy kómekshisi paida boldy.
eGov AI qosymshaǵa kiriktirilgen jáne paidalanýshylarǵa memlekettik qyzmetter jóninde qajetti aqparatty jyldam tabýǵa kómektesedi. Ol chat formatynda jumys isteidi – suraq qoisańyz, kómekshi qarapaiym tilmen ne isteý keregin túsindiredi, qajet bolsa birden tiisti bólimge nemese qyzmetke baǵyttaidy. Mundai tásil ýaqytty únemdep, navigatsiiany jeńildetedi. Izdeý jolaǵy janyndaǵy eGov AI belgishesin basý jetkilikti – sol sátte chat ashylyp, birneshe sekýnd ishinde jaýap alýǵa bolady.
Qaýipsizdik kúsheitildi
Jańartý barysynda aqparattyq qaýipsizdikke erekshe mán berildi. Jeke derekterdi qorǵaý deńgeii arttyryldy, júieniń syrtqy qaýipterge tózimdiligin joǵarylatýǵa baǵyttalǵan tehnikalyq jetildirýler engizildi.
Yńǵaily navigatsiia
Basty bette endi eń tanymal servisterdiń belgisheleri kórsetiledi – onyń ishinde memlekettik qyzmetterge jedel qol jetkizý múmkindigi de bar. Kózge birden túsetin jerge ornalastyrylǵan eGov logotipi qyzmetter katalogyna tikelei ótedi. Munda barlyq qyzmetter taqyryptar boiynsha rettelip berilgen. Navigatsiia elektrondyq úkimet jáne E-litsenziialaý portaly baǵyttary boiynsha bólingen. Tómengi bólikte jańa múmkindikter jónindegi qysqasha aqparattyq bannerler, sondai-aq TOP-qyzmetter, tanymal jáne usynylǵan qyzmetter tizimi ornalasqan.
Jańartylǵan «Servister» bólimi
Qoldanýshylar úshin barlyq tsifrlyq servister tizimi endi qosymshanyń tómengi mázirindegi «Servister» belgishesi arqyly qoljetimdi. Basty bettegi tanymal servisterden bólek, munda barlyq qoljetimdi quraldar bólimder boiynsha toptastyrylǵan.
Interfeisi de yńǵailyraq boldy: ár servis qasynda túireýish beinesindegi belgishe bar – ony basqanda qyzmet avtomatty túrde tanymaldar tizimine qosylady. Sondai-aq negizgi fýnktsiialardy qysqasha sipattaityn bannerler ornalastyrylǵan, bul qosymsha múmkindikterdi tezirek igerýge kómektesedi.
Tsifrlyq qujattarǵa jedel qol jetkizý
«Tsifrlyq qujattar» bólimi aitarlyqtai jańartyldy. Jeke kýálik, pasport, týý týraly kýálik jáne ózge de mańyzdy qujattar endi basty bette birden kórsetiledi – jeke bólimge kirýdiń qajeti joq. Bul qajetti qujatty nemese onyń túpnusqalyǵyn tekserýge arnalǵan QR-kodty lezde kórsetýge múmkindik beredi.
Ómirlik jaǵdailar katalogy
Paidalanýshylarǵa qolaily bolýy úshin ómirlik jaǵdailar boiynsha jeke katalog engizildi. Munda, mysaly, emhanaǵa tirkelý, qujattardy qalpyna keltirý nemese júrgizýshi kýáligin alý tártibi boiynsha kezeń-kezeńimen nusqaýlyq berilgen. Qajetti jaǵdai tańdalǵan kezde qurylymdalǵan aqparat ashylady: qandai áreketterdi oryndaý kerek, qaida júginý qajet, qai qyzmetti paidalaný kerek jáne osy jaǵdaida qandai normativtik qujattar qoldanylady.
Ár ómirlik jaǵdai interaktivti saýalnama arqyly tolyqtyrylady. Onyń nátijesi boiynsha paidalanýshyǵa jeke stsenarii usynylady. Eger usynylǵan sheshim sáikes kelmese, saýalnamany qaita ótip, balama nusqany alýǵa bolady.
eGov QR qyzmetiniń jetildirilýi
Endi ekranda qyzmettiń maqsaty týraly túsinikteme kórsetiledi, al qajet bolǵan jaǵdaida túngi ýaqytta qoldanýǵa yńǵaily bolý úshin ekran avtomatty túrde jaryqtanady.
«Habarlamalar» bólimin jańartý
Qyzmet mártebeleri, saýalnama nátijeleri jáne mańyzdy jańartýlar týraly habarlamalar endi taqyryptar boiynsha toptastyrylǵan, bul qajetti aqparatty izdeýdi jeńildetedi.
Jeke profildegi keńeitilgen derekter
Profilde endi jeke málimetter, otbasy, densaýlyq, eńbek qyzmeti, aiyppuldar, múlik jáne basqa da salalarǵa qatysty aqparat kórsetiledi. Sondai-aq berilgen kelisimder tarihy qoljetimdi, al qajetti bólimge ótý aiqyn jáne logikalyq navigatsiia arqyly júzege asady.
eGov Mobile-dyń aýqymdy jańartýy QR Tsifrlyq damý, innovatsiialar jáne aeroǵarysh ónerkásibi ministrliginiń Memlekettik kórsetiletin qyzmetter komiteti men «Ulttyq aqparattyq tehnologiialar» AQ-nyń birlesken jumysynyń nátijesi boldy.
