Eýraziialyq ekonomikalyq odaq Qazaqstannyń úshinshi elderge eksport kólemin ulǵaitýǵa kómektesti. Bul týraly Saýda jáne integratsiia vitse-ministri Janel Kýshýkova aityp berdi, dep habarlaidy QazAqparat.
Vitse-ministrdiń aitýynsha, 2014 jyly EAEO qurý qarsańynda qaita óńdeý eksporty shetelge satylǵan jalpy kólemniń 23,2%-yn quraityn. Al ótken jyly pandemiiaǵa bailanysty taýar ainalymynyń jalpy quldyraýynda da Qazaqstannyń shikizattyq emes eksporty 35%-dan asqan.
«Eýraziialyq ekonomikalyq odaqtyń múmkindikteri oǵan kóp yqpal etti. Bizge EAEO boiynsha seriktes elder infraqurylymynyń qoljetimdi bolýy jáne temirjol kóligimen tasymaldaýǵa usynylǵan ishki tarifter kómektesip jatyr. Bul eksporttalatyn ónimniń túpkilikti qunyn aitarlyqtai tómendetedi. Qazaqstan teńiz porttarynan alys bolǵandyqtan, EAEO qurylǵanda ishki tarifterdi kózdegen edik. Bul maqsatqa jettik deýge bolady», - dedi J. Kýshýkova Ortalyq kommýnikatsiialar qyzmetinde ótken baspasóz máslihatynda.
Sonymen birge, spiker Eýraziialyq ekonomikalyq odaqtyń úshinshi eldermen erkin saýda týraly kelisimderge qol qoiýy qazaqstandyq kásipkerlerge kóptegen basymdyq beretinin, eksportty ulǵaitýǵa yqpal etetinin atap ótti.
«Erkin saýda aimaǵy týraly osyndai kelisimder aiasynda bizdiń kásipkerlerge kedendik bajdardy tólemei nemese aitarlyqtai tómendetip, tariftik tosqaýyldar men basqa da shekteýlerden tys úlken kólemdi naryqtarǵa shyǵý múmkindigi beriledi. Mysaly bizde Vetnammen, Serbiiamen, Iranmen jáne Singapýrmen erkin saýda aimaǵy týraly kelisim ornaǵan. Bul qazaqstandyq taýarlardyń eksportyn 1 mlrd AQSh dollarynan astam ulǵaitýǵa kómektesedi. Qazaqstannyń bir ǵana Vetnammen taýar ainalymy 54%-ǵa ósti», - dep túsindirdi J. Kýshýkova.
Qazirgi ýaqytta Eýraziialyq ekonomikalyq odaq Izrailmen, Egipetpen jáne Úndistanmen kelisim bekitý jóninde ýaǵdalasyp jatyr. Saýda ministrliginiń derekteri boiynsha, erkin saýda aimaǵy sheńberinde qazaqstandyq eksportty shamamen 800 mln AQSh dollaryna deiin ulǵaitatyn áleýet bar.
