2020 jyly Eýraziialyq ekonomikalyq odaqqa (EAEO) múshe memleketterdiń 2,3 myńǵa jýyq azamaty Memlekettik áleýmettik saqtandyrý qorynan (MÁSQ) jalpy somasy 588,3 mln teńgege áleýmettik tólemder aldy, dep habarlaidy QR Eńbek jáne halyqty áleýmettik qorǵaý ministrliginiń baspasóz qyzmeti.
2014 jylǵy 29 mamyrdaǵy Eýraziialyq ekonomikalyq odaq týraly shart sheńberinde EAEO-ǵa múshe memleketterdiń eńbekshileri men olardyń otbasy múshelerin áleýmettik qamsyzdandyrý (áleýmettik saqtandyrý) jumysqa ornalastyrýshy memlekettiń azamattarymen birdei sharttarda jáne tártippen júzege asyrylady.
Bul EAEO-ǵa múshe memleketterdiń eńbekshileri ýaqytsha eńbekke jaramsyzdyq jaǵdaiyna jáne ana bolýyna bailanysty áleýmettik saqtandyrýǵa, óndiristegi jazataiym oqiǵalardan jáne kásiptik aýrýlardan mindetti saqtandyrýǵa, sondai-aq mindetti meditsinalyq saqtandyrýǵa jatatynyn bildiredi. Tiisinshe, jumys berýshiler jumysqa ornalastyrýshy memlekettiń zańnamasyna sáikes olar úshin saqtandyrý jarnalaryn tóleýge mindetti.
Osylaisha, jumys berýshiler EAEO-ǵa múshe memleketterdiń beirezident jeke tulǵalarymen jasalǵan eńbek sharttarynyń negizinde osy jumyskerlerdiń eńbekaqysyn tóleý qorynyń 3,5% mólsherinde áleýmettik aýdarymdardy tóleýge tiis.
EAEO-ǵa múshe memleketterdiń eńbekshileri Qazaqstan Respýblikasynyń Mindetti áleýmettik saqtandyrý júiesine qatysýshylar retinde qyzmetkerdiń Qazaqstan Respýblikasynda turýǵa yqtiiarhatynyń jáne (nemese) turaqty turýynyń bolýyna qaramastan, MÁSQ-tan júktiligine jáne bosanýyna, jańa týǵan balany (balalardy) asyrap alýyna bailanysty tólemder alýǵa ótinish jasaýǵa quqyly.
2020 jyly MÁSQ-tan kórsetilgen áleýmettik tólemdi EAEO-ǵa múshe memleketterdiń 266 azamaty jalpy somasy 162,4 mln teńgege aldy, bul 2019 jylǵy 134 mln. teńgege qaraǵanda 21%-ǵa artyq, al alýshylar sany 13%-ǵa artty (2019 jyly – 235 adam).
Sonymen qatar, «Mindetti áleýmettik saqtandyrý týraly» QR Zańyna sáikes Qazaqstan Respýblikasynyń aýmaǵynda turaqty turatyn sheteldikter men azamattyǵy joq adamdar jáne áleýmettik saqtandyrý júiesiniń qatysýshylary bolyp tabylatyn qandastar MÁSQ-tan áleýmettik tólemderdi alý quqyǵyn Qazaqstan Respýblikasynyń azamattarymen teń paidalanady.
2020 jyly EAEO-ǵa múshe memleketterden shyqqan áleýmettik saqtandyrý júiesine qatysýshylar MÁSQ-tan mynadai áleýmettik tólemder aldy:
- eńbek etý qabiletinen aiyrylý boiynsha – 244 adam, jalpy somasy 72 mln teńge;
- asyraýshysynan aiyrylý boiynsha – 204 adam, jalpy somasy 57,5 mln teńge;
- jumysynan aiyrylý boiynsha – 220 adam, jalpy somasy 28,7 mln teńge;
- 1 jasqa deiingi bala kútimi boiynsha – 1 352 adam, jalpy somasy 267,7 mln teńge.
Esterińizge sala keteiik, Eýraziialyq ekonomikalyq komissiia men Halyqaralyq zeinetaqy jáne áleýmettik qorlar qaýymdastyǵy (HZÁQQ) arasyndaǵy yntymaqtastyq týraly memorandýmǵa 2018 jylǵy 20 aqpanda qol qoiylǵan bolatyn.
Memorandým sheńberinde áleýmettik qamsyzdandyrý, onyń ishinde EAEO jáne Halyqaralyq zeinetaqy jáne áleýmettik qorlar qaýymdastyǵyna múshe memleketterdegi azamattardy áleýmettik saqtandyrý tártibi aiqyndalǵan.
MÁSQ 2009 jyldan bastap Halyqaralyq zeinetaqy jáne áleýmettik qorlar qaýymdastyǵyna múshe.
