EAEO elderiniń eksportyn damytý úshin taýarlardyń erkin tranziti máselesin sheshý qajet. Bul týraly Eýraziialyq úkimetaralyq keńestiń keńeitilgen otyrysynda QR Premer-Ministri Álihan Smaiylov aitty, dep habarlaidy QazAqparat.
«Eksportty ulǵaitý jáne ony yntalandyrý is-sharalaryn qabyldaý basym mindet sanalady. EAEO-ǵa múshe memleketterdiń eksportyn úshinshi elderdiń naryǵyna ilgeriletýge járdemdesýdiń tiimdi is-sharasy – kóliktik infraqurylymdarǵa, onyń ishinde teńiz porttaryna teń qoljetimdilik. Ony qamtamasyz etý qajettiligi Eýraziialyq ekonomikalyq odaq qyzmetiniń negizinde jatyr. Biraq, atalǵan printsipti is júzinde iske asyrý jónindegi osydan 5 jyl buryn bastalǵan jumys búginde áli aiaqtalmaǵan. Shart erejeleriniń tezirek oryndalýyn qamtamasyz etý jáne port qyzmetterine qoljetimdilikke nuqsan keltirmeýge kepil beretin tiisti kelisimderdi jasaý qajet», - dedi Qazaqstan Premer-Ministri.
Sonymen qatar Úkimet basshysy EAEO elderiniń eksportyn damytý úshin taýarlardyń erkin tranziti máselesin sheshý qajettigine nazar aýdartty.
«Usynylatyn tranzit sharttary eksport úshin jii eńserilmeitin kedergige ainalady. Bul teńizge tikelei shyǵatyn joly joq memleketterdiń ekonomikalyq salalaryna barynsha teris áserin tigizedi. Osy jáne ózge de máselelerde komissiia proaktivti ustanymda bolýy tiis. Taraptardyń baiqaýshy bolyp otyrýyna jol bermeý kerek. Alqa músheleri kez kelgen máselede Odaq týraly shartta kórinis tapqan barlyq normalardy jedel júzege asyrýǵa baǵyttalǵan ymyraly sheshim tabýy qajet. Bul rette halyqaralyq qyzmetshiler mártbesi týraly da esten shyǵarmaý jáne jibergen eldiń paidasy úshin «kórpeni ózine tartpaý» kerek», - dedi Álihan Smaiylov.
