QR Eńbek jáne halyqty áleýmettik qorǵaý ministrligi EAEO aýmaǵynda jumysqa turý tártibine qatysty túsinikteme berdi, dep habarlaidy "Ult aqparat".
«Biylǵy 1 qańtardan bastap 2019 jylǵy 20 jeltoqsandaǵy Eýraziialyq ekonomikalyq odaqqa (EAEO) múshe memleketterdiń eńbekshilerin zeinetaqymen qamsyzdandyrý týraly kelisim kúshine endi. Onyń aiasynda uiymǵa múshe memleketterdiń azamattary EAEO-ǵa basqa múshe memleketterde eńbek qyzmetin júzege asyrý barysynda alǵan zeinetaqy quqyqtaryn qalyptastyrý, saqtaý jáne iske asyrý quqyǵyn aldy. Osy Kelisim 2014 jylǵy 29 mamyrdaǵy EAEO týraly shartty tolyqtyrady. Jasalǵan jaǵdailar EAEO-ǵa múshe memleketter aýmaǵyndaǵy azamattardyń eńbek qyzmetin zańdastyrýǵa qosymsha yntalandyrý bolyp sanalady jáne EAEO aýmaǵynda eńbek resýrstarynyń biryńǵai naryǵyn qalyptastyrýǵa kómektesedi», - delingen Eńbek ministrligi málimetinde.
Qazirgi ýaqytta múshe memleketterdiń azamattaryna jumysqa ruqsat alý úshin jumysqa ornalastyrýshy memlekettiń tilin, zańnamasyn jáne tarihyn bilý emtihandaryn tapsyrýdyń, sondai-aq kóptegen kásipter úshin bilim týraly qujattardy taný boiynsha qosymsha rásimderdi ótkizýdiń qajeti joq.
Budan basqa, qyzmetkerler úshin tek eńbek sharty boiynsha ǵana emes, azamattyq-quqyqtyq shart boiynsha da jumys isteý múmkindigi qarastyrylǵan, bul olardyń jumysqa ornalasý aiasyn aitarlyqtai keńeitedi.
«Bul rette jumysqa ornalastyrýshy memlekettiń aýmaǵynda ýaqytsha bolý merzimi jumys berýshimen jasalǵan eńbek nemese azamattyq-quqyqtyq sharttyń qoldanylý merzimimen aiqyndalady. Jumysqa ornalastyrýshy memlekettiń aýmaǵyna kelgen kúnnen bastap 90 táýlik ótkennen keiin shart merziminen buryn buzylǵan jaǵdaida múshe memlekettiń azamaty 15 kún ishinde elden tys jerge shyqpai jańa shartqa turýǵa quqyly. Múshe memleketter eńbekshileriniń jaldanyp istegen alǵashqy kúnderinen bastap tabystaryna jumysqa ornalastyrýshy memlekettiń salyq rezidentteri úshin kózdelgen stavka boiynsha salyq salynady. Eńbekshilerdiń balalarynyń mektep jáne mektepke deiingi bilim berý mekemelerinde oqýǵa quqyǵy bar. Múshe memleketterdiń eńbekshilerine jáne olardyń otbasy múshelerine tegin jedel jáne shuǵyl meditsinalyq kómek alý quqyǵy berildi», - delingen vedomstvo habarlamasynda.
EAEO-ǵa múshe memleketter bolyp sanalmaityn úshinshi elderge qatysty Qazaqstanda kvotalaýdyń arnaiy júiesi jumys isteidi: QR Úkimeti jyl saiyn otandyq eńbek naryǵyna tartýǵa bolatyn sheteldik jumys kúshiniń shekti sanyn belgileidi. Kvota negizinde jergilikti atqarýshy organdar jumys berýshilerge sheteldikterdi jumysqa tartýǵa ruqsat beredi. EAEO-ǵa múshe memleketterdiń azamattaryna qatysty mundai talaptar kózdelmeidi.
