Foto: Olympic.kz
13-20 maýsym kúnderi aralyǵynda Majarstannyń Býdapesht qalasynda dziýdodan álem chempionaty ótedi, dep habarlaidy Ult.kz QR Týrizm jáne sport ministrligine silteme jasap.
Majarstan memleketi araǵa 4 jyl salyp, qaita jahandyq dodany qabyldaýǵa múmkindik aldy. 2021 jyly Qazaqstan sapynan 17 sportshy qatysyp, tek 60 kelide Ǵusman Qyrǵyzbaev kúmis júldege ie bolǵan. 4 jyldan keiin sol quramnan Qazaqstan atynan qaita Maǵjan Shamshadin, Ǵusman Qyrǵyzbaev, Erasyl Qajybaev jáne Ábiba Abýjaqynova baq synamaq.
2024 jyly Parij Olimpiadasynyń aldynda Abý-Dabide (BAÁ) ótken álem chempionatynda 48 kelidegi Ábiba Abýjaqynova ǵana qola júldeni jeńip aldy. Al 60 kelide Eldos Smetov qola júlde úshin beldesýde japoniialyq Taiki Nakamýraǵa ese jibergen edi.
1993 jyldan beri jahandyq dodaǵa qatysyp kele jatqan Qazaqstan óz tarihynda 2 altyn, 5 kúmis, 8 qola medal ielengen. 2009 jyly 100 kelidegi Maksim Rakov tuńǵysh ret álem chempiony atansa, 2015 jyly Astana tórinde 60 kelidegi Eldos Smetov top jardy.
Biylǵy básekede qurama sapynda 2 álem chempionatynda qola júlde alyp úlgergen, 48 kelidegi Ábiba Abýjaqynovaǵa júk artylatyny sózsiz. Bul salmaqtaǵy basty qarsylastardyń tizimine Parij Olimpiadasynyń qola júldegerleri Shirin Býkli (Frantsiia), Tara Babýlfat (Shvetsiia), 3 jyl boiy júlde tuǵyrynan kórinip júrgen Assýnta Skýtto (Italiia), Vakana Koga (Japoniia), Ganbaatar Narantsettseg (Mońǵoliia), Sabina Giliazova (beitarap sportshy) qosýǵa bolady.
Astanadaǵy úlken dýlyǵa básekesinde 60 kelide 3 birdei otandasymyz júlde alǵan soń, kópshiliktiń nazary osy salmaqqa aýmaq. Bizdiń quramadan Maǵjan Shamshadin men Sherzod Davlatov júldege aralasyp kórmek. Sherzod úshin bul debiýt bolsa, Maǵjan 2021 jyly dál osy Majarstan tórinde jartylai finalǵa deiin jetkenimen, júldege ilige almai, 5-orynmen shektelgen edi.
Biyl bul salmaqta basty favoritterdiń tiziminde Parij Olimpiadasynyń finalynda Eldosqa ese jibergen Lýka Mheidze (Frantsiia), Parij Olimpiadasynyń qola júldegerleri Riýdziý Nagaiama (Japoniia), Fransisko Garrigos (Ispaniia), byltyrǵy álem chempiony Georgii Sardalashvili (Grýziia), Ian Iýnvei (Taipei) tur.
66 kelide Parij Olimpiadasynyń qola júldegeri Ǵusman Qyrǵyzbaevqa da ońaiǵa túspesi anyq. Bul salmaqta 2 dúrkin Olimpiada chempiony Hifými Abe (Japoniia), byltyrǵy kúmis júldeger Takeshi Takeoka (Japoniia), Nýrali Emomali (Tájikstan), Denis Vierý (Moldova), Valid Hiar tosqaýyl bolmaq.
Ózge salmaqtardan Abylaihan Jubanazar (81 keli), jas bolsa da qairatty Maksim Meiirlan, Marat Baikamýrovtan (100 keli) jaqsy beldesýler kútemiz.
