Búgin Djakartadaǵy atletikalyq aýylda Qazaqstan Respýblikasynyń memlekettik týy saltanatty túrde kóterildi, dep habarlaidy "Ult aqparat" Olympic.kz saityna silteme jasap.
Elimizdiń týyn resmi túrde kóterý saltanatyna Qazaqstan quramasynyń sportshylary men elimizdegi sport salasyn basqarýshy mamandar qatysty.
Qazaqstan Ulttyq Olimpiadalyq komiteti sport Direktsiiasynyń basshysy, Aziia oiyndaryndaǵy Qazaqstannyń sporttyq delegatsiiasynyń jetekshisi Elsiiar Qanaǵatov tý kóterý saltanatyna jinalǵan sportshylarǵa sáttilik tilep, Aziia oiyndarynyń Qazaqstan úshin mańyzdy sport dodasy ekenin atap ótti.
«Búgin Aziia oiyndarynda elimizdiń kók bairaǵy kóterildi. Qazirgi tańda 200-ge jýyq sportshy Djakarta men Palembang qalalaryndaǵy atletikalyq aýylǵa kelip qonystanýda. Quramadaǵy kóptegen sportshylar jarys kestesine sai Aziia oiyndaryna aldaǵy ýaqytta ushyp keledi. Atletterdi kútip alý, ornalastyrý, tamaqtandyrý máseleleri túgeldei sheshilgen. Búginde Indoneziiadaǵy sportshylarymyz jattyǵý jumystaryn bastap ketti. Al keibir komandalyq sport túrlerinen irikteý kezeńindegi matchtar ótip jatqanyn bilesizder. Gandbolshylar men basketbolshylarymyz Aziia oiyndaryndaǵy irikteý kezeńderin ótkizýde. Biz sportshylarymyzǵa sáttilik tileimiz! Jankúierler úmit artyp otyrǵandyqtan, halyqty qýantady dep senemiz», - deidi Elsiiar Qanaǵatov.
Óz kezeginde sportshylar atynan sóz alǵan sporttyq gimnastika sheberi Milad Karimi Aziia oiyndarynda júlde alý úshin bar kúshin salatynyn jetkizdi.
"Aziia oiyndaryna alǵash ret qatysyp otyrmyn. Mundaǵy komandalyq rýhty sózben jetkizý múmkin emes. Osyndai keremet sátti Ýniversiada kezinde bastan ótkergen edim. Komandalastarymmen birge elimizdi qýantyp, júlde alýdy maqsat ettik. Jankúierler senimin aqtaimyz", - deidi Karimi.
Eske sala keteiik, Jazǵy Aziia oiyndary 18 tamyz - 2 qyrkúiek aralyǵynda Djakarta men Palembang qalalarynda ótedi. Qazirgi tańda Djakartadaǵy atletter qalashyǵyna olimpiadalyq sport túrleri boiynsha 15 komanda, Palembangta 4 komanda qonystandy.
