Kelesi jyldan bastap Qazaqstanda ataýly áleýmettik kómektiń jańa formaty engiziledi. Sonyń aiasynda járdemaqylar 25 paiyzǵa artady. Alaida atalǵan kómektiń ózindik sharttary bar, dep xabarlaidy QazAqparat tilshisi.
QR Eńbek jáne xalyqty áleýmettik qorǵaý ministri Tamara Dúisenovanyń aitýynsha, jańa format aiasynda kópbalaly jáne az qamtylǵan otbasylarǵa beriletin úsh túrli járdemaqylar biriktiriledi. Sonyń barlyǵy bir ataýly áleýmettik kómek retinde beriletin bolady. Halyq qujat mashaqatynan da qutylady. Úsh jerge qujat aparýdyń qajeti joq. Bárin jumyspen qamtý ortalyǵyna tapsyrýǵa bolady. "Sosyn búginde úsh járdemaqynyń jalpy somasy az qamtylǵan otbasynyń árbir múshesine ai saiyn 6 396 teńgeni qurap otyr. Al jańa júiede kúnkóris deńgeiiniń 40 paiyzdan 50-ge kóterilýine bailanysty árbir jan basyna qosymsha beriletin kómektiń somasy shamamen 2 500 teńgege artqaly otyr. Osynyń nátijesinde ataýly járdemaqynyń mólsheri ortasha eseppen qazir berilip júrgen úsh járdemaqydan 25 paiyzǵa artyq bolady. Ol úshin kelesi jylǵy biýdjette 42,8 mlrd teńge qarastyrylǵan", - deidi Dúisenova.
Ministrdiń sózine qaraǵanda, jańa formattaǵy ataýly áleýmettik kómektiń ózindik sharttary da bar. Otbasyda eńbekke qabiletti azamattardyń barlyǵy jumyspen qamtý sharalaryna (memlekettik baǵdarlamalar aiasynda oqytý, kásibi biliktilikti arttyrý, jumysqa turý, kásip ashý sharalaryna - avt.) qatysýy shart. Eger ondai adamdar jumyspen qamtý sharalarynan bas tartsa, onda ataýly áleýmettik kómek taǵaiyndalmaidy. "Alaida kámelettik jasqa tolmaǵan balalarǵa, bala kútimimen otyrǵan analarǵa, naqty sebepterge bailanysty jumys istei almaityndarǵa áleýmettik kómek eshbir shartsyz taǵaiyndalyp, tólenetin bolady", - dep atap kórsetti Dúisenova.
