Dúniejúzilik banktiń jyl saiyn júrgizetin Memlekettik basqarý indikatorlary (Worldwide Government Indicators) boiynsha zertteýinde Qazaqstannyń kórsetkishi jaqsardy, dep habarlaidy "Ult aqparat".
WGI – Dúniejúzilik bank tobynyń álem elderiniń memlekettik basqarý sapasy men tiimdiligi salasyndaǵy jetistikterin baǵalaityn keshendi zertteýi. Zertteý ádistemesinde memlekettik basqarý sapasynyń barlyq basty parametrin keshendi túrde kórsetetin negizgi alty indikator qoldanylady.
Jańartylǵan esepte Qazaqstan 6 kórsetkishiniń beseýin jaqsartqan:
1. Úkimet jumysynyń tiimdiligi;
2. Regýliatorlyq klimat sapasy;
3. Saiasi turaqtylyq;
4. Zańnyń ústemdigi;
5. Jemqorlyqpen kúres.
Dúniejúzilik bank bilik institýtyn nyǵaitý, onyń tiimdiligin, ashyqtyǵy men boljamdylyǵyn arttyrý boiynsha Úkimettiń birizdi jumysyn joǵary baǵalap otyr.
Zertteýge sáikes, Úkimettiń jumysynyń tiimdiligi memlekettik apparat jumysynyń sapasy jáne saiasi, ekonomikalyq baǵdaryndaǵy turaqtylyǵy, sonymen qatar halyqqa bazalyq memlekettik qyzmetterdi kórsetý kezinde (kólik, infraqurylym) qanaǵattanýshylyq deńgeiiniń esebinen kórsetkishi jaqsarǵan.
Regýliatorlyq klimat sapasy boiynsha Qazaqstan birneshe jyl boiy qalǵan bes kórsetkishten qaraǵanda jaqsyraq nátijege qol jetkizip keledi. 2019 jyly Qazaqstan biznes júrgizetin sheteldik investorlardyń táýekelderin azaitý boiynsha tiimdi sharalarynyń arqasynda óz pozitsiiasyn jaqsartqan edi.
Bank sonymen qatar biliktiń sabaqtastyǵy jolǵa qoiylyp, ishki jáne syrtqy qaqtyǵystar bolmaǵandyqtan eldegi saiasi turaqtylyq kórsetkishiniń jaqsarǵanyn atap ótedi.
Zańnyń ústemdigi kórsetkishi boiynsha daýdy retteýdiń balamaly júiesin damytý, quqyqtyń qorǵalýyn qamtamasyz etý jáne azamattyq, qylmystyq zańnamanyń jetildirilýi esebinen progres bary baiqalǵan.
Jemqorlyqpen kúres indikatory biznes júrgizýde jemqorlyq qaýpiniń tómendeýi esebinen jaqsarǵan.
Jalpy WGI esebin ulttyq ekonomikalar boljamy men nesie baǵalaýyn qalyptastyrý úshin jetekshi halyqaralyq qarjy uiymdary, damý institýttary men reiting agenttikteri paidalanady.
Sonymen qatar, Fitch reiting agenttiginiń zertteýi de ulttyq ekonomikany «VVV» deńgeiinde bekemdep, Úkimet jumysynyń tiimdiligin atap ótken.
